Kentaýdaǵy gaz jarylysynan zardap shekken ekinshi adam kóz jumdy
TÚRKІSTAN. KAZINFORM – Túrkistan oblysy Kentaý qalasynda qoǵamdyq tamaqtaný ornynda bolǵan gaz jarylysynan zardap shekken ekinshi adam qaıtys boldy. Bul aqparatty jergilikti ákimdik rastady.
Órt kezinde denesiniń 90 paıyzyn kúıik shalǵan azamat keshe jer qoınyna tapsyrylǵan.
Eske salaıyq, 1 qańtar kúni túngi saǵat 2:00 shamasynda Kentaý qalasynda kópqabatty turǵyn úıdiń birinshi qabatynda ornalasqan qoǵamdyq tamaqtaný ornynda gaz-aýa qospasynyń jarylysy bolyp, sońy órtke ulasqan edi.
Qaıǵyly oqıǵadan 18 jastaǵy stýdent oqıǵa ornynda qaza taýyp, tórt adam túrli dene jaraqatymen aýrýhanaǵa jetkizildi. Olardyń ekeýi jansaqtaý bólimine jatqyzylǵan bolatyn.
Atalǵan derek boıynsha qylmystyq is qozǵalyp, qazirgi tańda tergeý amaldary júrgizilip jatyr.
Budan buryn Kentaýdaǵy órtten soń óńirde qaýipsizdik sharalary kúsheıtilip, aýqymdy reıd bastalǵanyn jazǵan edik.