Kentaýda jol erejesin buzǵan 76 júrgizýshige ákimshilik hattama toltyryldy
KENTAÝ. QazAqparat – Túrkistan oblysy, Kentaý qalasynda polıtseıler úsh kún boıy «Qaýipsiz jol» jedel-profılaktıkalyq is-sharasyn ótkizdi. Aýa-raıynyń qolaısyzdyǵy saldarynan bolatyn jol-apattarynyń aldyn alý maqsatynda uıymdastyrylǵan sharada jol erejelerin buzǵan 76 júrgizýshige ákimshilik hattama toltyryldy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, reıdke Patrýldik polıtsııa tobynyń 14 qyzmetkeri jumyldyrylǵan. Shara barysynda 1 júrgizýshiniń avtokólikti mas halde basqarǵany anyqtalyp, qujattary Kentaý qalalyq sotyna joldandy. Ózge kólik tizgindeýshilerge jol boıynda abaı bolýǵa shaqyratyn eskertýler men jadnamalar taratyldy.
Aıta keteıik, óńirge kúni keshe ǵana qar jaýyp júrgizýshiler biraz ábigerge túskeni belgili. Al, Qazyǵurt aýdanynda tipti birden tórt kólik soqtyǵysyp, 15 adam zardap shekken bolatyn.
Jaraqat alǵan 14 jolaýshy aýrýhanaǵa jetkizilip, 8 adam jansaqtaý bólimine jatqyzyldy. Dárigerler naýqastardyń jaǵdaılaryn qanaǵattanarlyq dep baǵalaýda.
