Kentaýda jylý berý maýsymy aıaqtaldy

TÚRKІSTAN. KAZINFORM — Búginnen bastap qalaǵa jylý berý toqtatyldy.

Bıyl Kentaýda ornalasqan № 5 Jylý energo ortalyǵyndaǵy alty qazandyqqa qaıta qurý jumystary júrgizildi. Budan bólek, taǵy 2 qazandyq aǵymdaǵy jóndeýden ótti. 6,6 shaqyrym magıstraldy jylý qubyry jańartyldy. 1 týrbına men ózge de qural-jabdyqtarǵa aǵymdaǵy jóndeý jumystary júrgizildi. 

— Bıylǵy jylǵy 3 sáýirden 4 sáýirge qaraǵan túni qalaǵa jylý berý toqtatyldy. Barshańyzdy jylý berý maýsymynyń sátti aıaqtalýymen quttyqtaımyn. Túsinistik pen qoldaý kórsetkenderińiz úshin alǵys bildiremin, — delingen «Kentaý Servıs» KMM dırektory Saıahat Ybyshevtiń áleýmettik jelidegi jazbasynda.

Aıta keteıik, budan buryn qurylǵanyna 90 jyl tolǵan Kentaý jylý ortalyǵynyń 85 paıyzǵa tozǵandyǵyn jazǵan bolatynbyz.