Kentaýda jedel járdem dárigerleri sýǵa ketken 42 jastaǵy azamatty aman alyp qaldy
TÚRKІSTAN. QazAqparat - Túrkistan oblysynyń jedel járdem qyzmetkerleri sýǵa batyp, ózine qol salǵan azamatty qutqaryp qaldy, dep habarlaıdy QazAqparat.
Oblystyq densaýlyq saqtaý basqarmasynyń málimetinshe, Kentaý qalasynyń 42 jastaǵy turǵyny «Tasaryq» sý arnasynda kópirden sekirip, ómirine qol salǵan. Abyroı bolǵanda polıtsııa qyzmetkerleri jigittiń sýǵa batqanyn kórip, tez arada qutqaryp qaldy.
«Tártip saqshylary shuǵyl túrde jedel járdem qyzmetkerlerin kómekke shaqyrǵan. Qutqarý toby 7 mınýtyń ishinde kelip jetken. Medıtsına qyzmetkerleri kelgende azamattyń tynys alýy toqtap, klınıkalyq ólim bolǵan. Medıtsınalyq kómektiń arqasynda azamat 2 mınýttan soń ózine kelgen. Jedel járdem kóligimen Kentaý qalalyq aýrýhanaǵa jetkizilip, qosymsha emdik sharalary kórsetildi. Ómirine eshqandaı qaýip joq» delingen habarlamada.
Dárigerlerdiń aıtýynsha ózine qol jumsamaq bolǵan naýqas júıke júıesiniń aýytqýy boıynsha dıspanserlik esepte turady.
Jalpy, Túrkistan oblysynyń jedel járdem qyzmetkerleri jyl basynan beri 160 myńnan astam shaqyrtýǵa shyqqan.
Onyń ishinde 10 adamnyń ómirine arasha túsip, naqty qaterden aman alyp qalǵan.
