Kentaýda ustazdar alleıasy paıda bolady
KENTAÝ. QazAqparat – Kentaý qalasynda ustazdar alleıasy paıda bolady, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.
Kentaý qalasy kúnnen kúnge ajarlanyp keledi. Kóktem shyǵysymen shaǵyn qalanyń shyraıy kirip, kóshe boılarynda kórki kóz tartar birneshe gúlzarlar ornalastyrylǵan. Ortalyq kóshe kúrdeli jóndeýden ótip, ishki oram joldar da qalypqa keltirilýde.
Aldaǵy ýaqytta qala taǵy bir nysanmen tolyqpaq. Kentaý qalasynyń ákimi Daýren Maqajanovtyń tapsyrmasymen qala ortalyǵynan «Ustazdar alleıasynyń» qurylysy bastaldy. Bul alleıaǵa kentaýlyq ustazdar qaýymynyń qurmetine oraı erekshe ataý berilmek.
Qaladaǵy Abaı dańǵylynan boı túzeıtin alleıada úlken qyl qalamnan eskertkish ornatylatyn bolady. Mańaıynda turǵyndardyń tynystap demalýyna barlyq jaǵdaı jasalynyp, arnaıy zamanýı oryndyqtar men jaryq shamdar alleıanyń ajaryn odan ári asha túspek.
Sonymen qatar, alleıada balalarǵa arnalǵan sońǵy úlgidegi oıyn alańshalar da qoıylmaq.
