Kentaýda «Úlgili otbasy - máńgilik eldiń tiregi» atty otbasylyq baıqaý ótti

KENTAÝ. QazAqparat – Túrkistan oblysy Kentaý qalasynda «Úlgili otbasy - máńgilik eldiń tiregi» atty otbasylyq baıqaý ótti. Qalalyq ishki saıasat jáne «Máńgilik el» qoǵamdyq birlestiginiń uıymdastyrýymen ótken sharada birneshe otbasy qatysyp, baq synady, dep habarlaıdy QazAqparat tilshisi.

Bul baıqaý Elbasy N.Á.Nazarbaevtyń «Rýhanı jańǵyrý: Ulttyq biregeılikti saqtaý» maqalasy aıasynda jáne otbasy ınstıtýttaryn nyǵaıtý men bedelin kóterý, neke men otbasy qundylyqtaryn nasıhattaý maqsatynda uıymdastyryldy.

Baıqaýǵa Jańa Iqan, Shornaq, Babaıqorǵan jáne Hantaǵy aýyldarynan januıalar qatysty. Qatysýshylar óz otbasyn tanystyryp, salt dástúrlerdi nasıhattaý boıynsha kórinis kórsetti. Tusaýkeser, besikke salý syndy dástúrlerimizdi jańǵyrtyp, salt-dástúr, otbasy qundylyqtaryn nasıhattaýǵa tyrysty.

Sondaı–aq, otbasylyq óner saıysyna qatysyp, túrli suraqtarǵa jaýap berdi. Barlyq qatysýshylar baıqaýǵa erekshe daıyndyqpen kelip, ónerlerin ortaǵa saldy. Úlkennen úlgi alyp, artynan ergen óskeleń urpaqqa ónege kórsetip júrgen otbasylardyń árqaısysynyń ózindik erekshelikteri boldy.

Keı otbasylar balalarynyń jetistikterine toqtalsa, endi biri nemereleriniń ónerin maqtan etti. Barlyq kezeńnen súrinbeı ótken Jorabekovter áýleti eń «Úlgili otbasy» dep tanyldy.