Kentaýda polıtsııa kóligi men jeńil avtomobıl soqtyǵysyp, 6 adam jaraqat aldy
KENTAÝ. QazAqparat - Túrkistan oblysynda «Neksııa» avtokóligi men polıtsııanyń qyzmettik kóligi soqtyǵysty, dep habarlaıdy QazAqparat oblystyq polıtsııa departamentine silteme jasap.
14 qarasha túngi ýaqytta Kentaý polıtsııa bóliminiń kezekshi bólimine Kentaý-Túrkistan tasjolynda jol apaty bolǵany týraly habarlama kelip tústi.
Іrgeles aýyldyń turǵyny tizgindegen «Neksııa» markaly avtokólik patrýl polıtsııasynyń qyzmettik kóligine soqtyǵysqan.
Jol-kólik oqıǵasynan 6 adam, ıaǵnı eki júrgizýshi jáne eki kóliktiń 4 jolaýshysy túrli jaraqat aldy, olarǵa medıtsınalyq kómek kórsetildi.
Bul jaıt qalalyq polıtsııa bóliminde tirkeldi. «Neksııa» avtokóliginiń júrgizýshisi jol-kólik oqıǵasyn jasaǵany úshin óz kinásin moıyndady. Tergeýshiler oqıǵanyń tolyq mán-jaıyn anyqtaýda. Avtokólikterge materıaldyq shyǵyn kelgen.
Óz kezeginde Túrkistan oblysynyń polıtseıleri azamattarǵa jol júrý erejelerin saqtaýdy, ásirese mas kúıde rólge otyrmaýdy eskertedi.
«Sondaı-aq, jolda jyldamdyqty asyrmańyz, manevr jasaý erejelerin buzbańyz, qarsy baǵytqa shyqpańyz, jol qozǵalysy erejelerin esten shyǵarmańyz. Sizdiń ómirińiz ǵana emes, sonymen qatar joldardaǵy jolaýshylar men jaıaý júrginshilerdiń qaýipsizdigi de jol erejelerin saqtaýǵa baılanysty ekenin umytpańyz» dep eskertedi polıtsııa.
