Kentaýda páter órtenip, 8 jasar bala besinshi qabattan sekirip ketti

TÚRKІSTAN. QazAqparat - Kentaýda páter órtenip, 8 jasar bala 5 qabattan sekirip ketti, dep habarlaıdy QazAqparat tilshisi.

Oqıǵa búgin Kentaý qalasynda boldy. Kúndizgi saǵat 12:47 shamasynda Tólebı kóshesindegi №61 úıdiń 5 qabatynda ornalasqan 2 bólmeli páterde órt shyqqan. Páter ishinde qalǵan eki jasóspirimniń biri qoryqqanynan 5-qabattan sekirip ketipti. Ókinishke oraı, ol aýrýhanada kóz jumdy. Al, úı ishinde qalǵan 10 jasar qyz ystan ýlanyp qalǵan. Qazir anasymen birge aýrýhanada em qabyldap jatyr.

«Ákesi vahtalyq qyzmette bolǵan. Al, anasy jumysqa ketkende esikti qulyptap ketipti. Sodan eki jasóspirim esikten shyǵa almaı qalǵan. Jalpy órtke qarsy 9 qyzmetker jumyldyryldy» -deıdi, Kentaý qalalyq Tótenshe jaǵdaılar bóliminiń bastyǵy Serik Tólegenov.

Aldyn ala boljam boıynsha órt elektr júıesiniń tuıyqtalýynan nemese balalardyń otpen oınaýynan shyǵýy múmkin. Alǵashqyda as bólme órtengen. Keıin býdaqtaǵan jalyn ózge bólmelerge jaıylyp ketken.