Kentaýda nóser jaýynnan keıin kósheler men aýlalardy sý basyp qaldy
TÚRKІSTAN. KAZINFORM – Kentaý qalasynda tolassyz jaýǵan jańbyr saldarynan kósheler men aýlalardy, sondaı-aq jeke turǵyn úıdi sý basty.
Áleýmettik jelide taraǵan vıdeolarǵa qaraǵanda, qala kóshelerinde kólkigen sý jaıaý júrginshiler men júrgizýshilerge qolaısyzdyq týǵyzǵan.
Oblystyq tótenshe jaǵdaılar departamentiniń málimetinshe, 23 sáýir kúni saǵat 15:30-16:30 aralyǵynda nóser jaýynnyń saldarynan qalanyń keıbir aýmaqtarynda sý deńgeıi 10-25 sm-ge deıin kóterilgen.
– Aldyn ala málimetke sáıkes, qala aýmaǵyndaǵy 23 aýla, 13 kóshe, ınfektsııalyq aýrýhananyń jertólesi jáne 1 jer úıdi sý basty. Shahterskaıa kóshesi, 137-úıde qabyrǵanyń qulaýy tirkeldi. Zardap shekkender joq, – delingen vedomstvo aqparatynda.
Qazirgi tańda oqıǵa ornynda tótenshe jaǵdaılar departamenti men jergilikti kommýnaldyq qyzmetter sýdy sorý jáne burý jumystaryn júrgizip jatyr.
Bul jumystarǵa TJD kúshterinen 70 jeke quram, 6 tehnıka jáne 14 motopompa, jergilikti atqarýshy organdardan 17 qyzmetker jáne 3 motopompa, «Aşysaı Sý» mekemesinen 10 qyzmetker jáne 2 motopompa, sondaı-aq «Jasyl Kentaý» JShS-nen 30 qyzmetker jáne 3 motopompa jumyldyrylǵan.
Budan buryn bıyl aqpan aıynda Kentaý qalasynda jańbyrdan keıin kóshelerdi sý basqanyn jazǵan edik.
