Kentaýda múgedektikti rastaıtyn qujat alyp beremin dep eldi aldaǵan áıel ustaldy
KENTAÝ. QazAqparat - Aǵymdaǵy jyldyń aqpan aıynyń sońynda Kentaý qalalyq polıtsııa bólimine jergilikti turǵyn aryzdanyp keledi. Ol óz aryzynda ózin memlekettik qyzmetkermin dep tanystyrǵan belgisiz azamatshanyń «múgedektikke shyǵaryp beremin dep» 70 myń teńgesin alyp, aldap ketkenin jazǵan.
Sodan «san soǵyp qalǵan» turǵyn birden polıtsııanyń kómegine júgindi, dep habarlaıdy QazAqparat Túrkistan oblystyq Polıtsııa departamentine silteme jasap.
Kentaý QPB-nyń polıtseıleri atalǵan jaıtqa baılanysty tergep-tekserý amaldaryn bastap ketedi. Aqyry júrgizilgen jedel is-sharalardyń nátıjesinde, birneshe kún ishinde qalalyq saqshylar alaıaqtyqqa kúdikti áıeldi anyqtaıdy. Ol osy qalanyń turǵyny bolyp shyqty.
Tergeý barysynda kúdikti áıeldiń Kentaý qalasynyń birqatar turǵyndaryn aldap, jalpy kólemi 700 myńǵa jýyq teńgeni ıemdengeni belgili boldy.
Atalǵan jaıttar boıynsha QR QK-niń 190-babymen sotqa deıingi tergep-tekserý jumystary júrgizildi. Búginde atalǵan iske qatysty barlyq qujattar jınaqtalyp, sotqa joldandy.
«Óz kezeginde Túrkistan oblysynyń polıtseıleri turǵyndarǵa alaıaqtardyń arbaýyna ermeı, kez-kelgen máseleni zań júzinde sheshýdi eskertedi. Egerde osyndaı alaıaqtardyń qylmysyna kýá nemese qurbany bolsańyz, «102» shuǵyl nómirine habar berińiz, óıtkeni der kezinde berilgen aqparat qylmystyń tez ashylýyna yqpal etedi»,-delingen habarlamada.
