Kentaýda mal urlyǵymen aınalysqan qylmystyq top ustaldy

NUR-SULTAN. QazAqparat - Kentaý qalasynyń polıtsııasyna jaqyn mańdaǵy aýyldardyń turǵyndary mal urlyǵy boıynsha aryzdanady. Jábirlenýshilerdiń biriniń aıtýynsha, belgisiz adamdar jaıylymnan onyń 5 bas sıyryn urlap ketken, al basqa aýyl turǵyny bolsa, jylqysynyń urlanǵanyn jetkizgen, dep habarlaıdy QAzAqparat óńirlik PD baspasóz qyzmetine silteme jasap.

Atalǵan jaıttardy polıtsııa qyzmetkerleri SDTBT-ǵa «Mal urlyǵy» baby boıynsha tirkedi, eki jaǵdaıda keltirilgen shyǵyn shamamen eki mıllıon teńgeni qurady.

Jedel-izdestirý is-sharalarynyń nátıjesinde Túrkistan oblysy PD Krımınaldyq polıtsııa qyzmetkerleri Kentaý QPB-nyń qyzmetkerlerimen birlese otyryp, 4 kúdiktini ustady. Olar Túrkistan jáne Kentaý qalalarynyń turǵyndary bolyp shyqty. Kúdiktiniń bireýi buryn mal urlaǵany úshin sotty bolǵan. Belgili bolǵandaı, jas jigitter kóbinese qaraýsyz qaldyrylǵan maldardy jaıylymnan nemese sharýashylyq aýlalarynan urlap keti potyrǵan. Sodan keıin urylar, urlanǵan maldy «Gazel» avtokóligine tıep, qylmys ornynan jasyrynyp otyrǵan.

Urlanǵan maldardy Tólebı aýdany aýmaǵynda satyp, aqshasyn óz qajettilikterine jumsaǵan.

Búgingi tańda tergeý kúdiktilerdiń mal urlyǵynyń 5 jaıtyna qatysy bar ekenin anyqtady, olardyń 4-eýi 2019 jyly jasalsa, 1 derek 2021 oryn alǵan. Jalpy kúdiktiler aýyl turǵyndarynan 16 bas iri qara men 1 jylqyny jymqyrǵan. Keltirilgen shyǵynnyń jalpy kólemi 6 mıllıon teńgeden asty. Polıtsııa urlanǵan jylqyny tárkilep alyp, zańdy ıesine qaıtaryp berdi. Tergeý jalǵasýda. Oqıǵanyń mán-jaıy jáne kúdiktilerdiń basqa da osyǵan uqsas mal urlyǵyna qatysy bar-joǵy anyqtalýda.