Kentaýda qujaty joq júrgizýshi polıtseılerge para usynǵan
Kentaý qalasyndaǵy kóshelerdi patrýldeý kezinde Túrkistan oblysy PD JPQ patrýldik polıtsııa batalonynyń avtoekıpajy jergilikti turǵynnyń tizginindegi «Mersedes Bents» markaly avtokóligin toqtatqan. Avtokólik júrgizýshisi M. Áýezov kóshesiniń boıymen qozǵalǵanda qarama-qarsy baǵytta kele jatqan kólik quraldarynyń qozǵalysyna kedergi keltirgen.
«Tekserý kezinde júrgizýshide kólik quralyn tirkeý kýáligi, mindetti saqtandyrý sharty jáne júrgizýshi kýáligi joq ekeni anyqtaldy. Ákimshilik quqyq buzý týraly hattama jasaý barysynda «Mersedes» kóliginiń júrgizýshisi polıtsııa qyzmetkerlerine jaýapkershilikten jaltarý úshin 7 myń teńge usynǵan. Para berý retinde qaralatyn bul áreketke polıtsııa tarapynan eskertý jasaldy. Alaıda oǵan qaramastan jas júrgizýshi óz is-áreketiniń qylmystyq jaýapkershilikke tartylatynyn bile otyryp, aqshany qyzmettik kóliktiń paneline qoıǵan. Bul jaıt polıtseılerdiń beınejetonynda tirkeldi» delingen habarlamada.
Qazirgi ýaqytta atalǵan jaıt boıynsha Túrkistan oblysy PD Ózindik qaýipsizdik basqarmasy QR QK 367-babynyń 1-bóligi «Para berý» boıynsha sotqa deıingi tergep-tekserý amaldaryn júrgizip jatyr. Er adam óz kinásin tolyq moıyndady.
Kúdiktige qatysty QR ÁQBtK úsh baby boıynsha ákimshilik hattama toltyryldy. Tártip buzýshynyń avtokóligi aıyp turaǵyna qoıyldy.