Kentaýda qýaty 50 MVt bolatyn kún elektr stansasy salynady
TÚRKІSTAN. QazAqparat - Túrkistan oblysynyń ákimi Janseıit Túımebaev reseılik «HEVEL KAZAKHSTAN» JShS dırektory Pavel Agafonovpen kezdesti. Basqosýda taraptar kúnnen qýat alatyn stansalar salý isi boıynsha áńgime órbitip, Kentaý qalasynda qýaty 50 MVt bolatyn kún elektr stansasyn salýǵa ýaǵdalasty. Joba quny - 50 mln AQSh dollary, dep habarlaıdy QazAqparat ákimdiktiń baspasóz qyzmetine silteme jasap.
Aşysaıdyń Qotyrbulaq eldimekeninen boı kóteretin nysanǵa ákimdik tarapynan 200 gektar jer telimi beriletin boldy. Qurylys jumystaryn erterek bastaýdy júktegen aımaq basshysy kún elektr stansasy salynyp bitkende, onyń baǵasy básekege qabiletti bolýyn jáne eń bastysy halyqqa tıimdi bolýy tıistigin jetkizdi. Sheteldik kompanııa jetekshilerimen ózara áńgimede mundaı stansalardy bolashaqta Ordabasy aýdanynan da salý máselesi sóz boldy.
2009 jyly negizi qalanǵan «Hevel» kompanııalar toby - kún energetıkasy salasynda Reseıdegi eń iri ıntegratsııalanǵan kompanııa. Seriktestiktiń negizgi qyzmeti kúnnen qýat alý isinde ǵylymı-zertteý jumystary men kún elektr stansalaryn salyp, ony paıdalaný, joǵary tehnologııaly kún modýlderin óndirýge baǵyttalǵan. Atalǵan zaýyt jyl saıyn uıashyqtyń tıimdiligi 22% - dan joǵary bolatyn 160 MVt geteroqurylymdyq kún modýlderin shyǵarady. Kompanııalar toby basqaratyn jobalardyń kólemi 907,5 MVt quraıdy.
Tıisti jumystardyń nátıjesinde, «Hevel» kompanııalar toby 2019-2020 jyldary Qazaqstannyń ońtústik óńirlerinde qýattylyǵy 70 MVt bolatyn kún generatsııasyn salý quqyǵyna ıe bolǵan-dy. Osylaısha, ótken jyldyń jeltoqsan aıynda Máskeýde ótken ınvestıtsııalyq forým aıasynda «Túrkistan» ÁKK, «Turkistan Invest» pen «Hevel» kompanııasynyń arasynda Túrkistan oblysynda kún elektr stansasynyń qurylysy týraly Memorandýmǵa qol qoıylǵan bolatyn.
