Kentaýda koronavırýs juqtyrǵan áıel deni saý sábıdi dúnıege ákeldi
KENTAÝ. QazAqparat – Kentaýda koronavırýs juqtyrǵan áıel deni saý sábıdi dúnıege ákeldi, dep habarlaıdy QazAqparat tilshisi.
Túrkistan oblysy, Kentaý qalasynyń 23 jastaǵy turǵyny COVID-19 ınfektsııasyn juqtyryp, juqpaly aýrýlar aýrýhanasyna jatqyzylǵan bolatyn. Aıy-kúni jetip, tolǵaǵy qysqan kelinshektiń ómirine qaýip tónýine baılanysty dárigerler shuǵyl túrde operatsııa jasady.
Dárigerlerdiń aıtýynsha, koronavırýske shaldyqqan áıeldiń jatyr tyrtyǵynan qan ketý jaǵdaıy bolǵan. Qaýipti dertke ushyraǵan júkti kelinshekke operatsııa reanımotolog-dáriger Erjan Jumashevtyń jetekshiligimen jasalyp, qazirgi tańda ol táýlik boıy ınfektsııalyq gospıtal dárigerleriniń baqylaýyna alynǵan. Qazirgi jaǵdaıy qalypty dep baǵalanǵan naýqas taǵy eki apta otbasymen kórise almaıdy.
«Koronavırýs indetine shaldyqqan naýqastarǵa operatsııa jasaýda qorǵanysh kıimderi azdap yńǵaısyzdyq týdyrady. Qalǵan jqmystar ádettegideı júzege asyrylady. Biz úshin bul áıeldiń saýyǵyp, perzentin qolyna alǵany úlken qýanysh bolar edi»,-deıdi reanımotolog-dáriger.
Al, dúnıege kelgen qyz balanyń salmaǵy – 3 kg, boıy – 51 sm. Náresteden birden koronavırýske taldaý alynǵan. Sábı indetten din aman ekeni anyqtalǵan. Qazir bólek palatada oqshaýlanyp, dárigerlerdiń baqylaýynda. Bul jas kelinshektiń ekinshi perzenti.
