Kentaýda koronavırýs juqtyrǵan áıel bosandy
KENTAÝ. QazAqparat – Túrkistan oblysy, Kentaý qalasynda koronavırýs juqtyrǵan áıel bosandy. Qazir sábı oqshaýlanyp, oblystyq perzenthanada dárigerlerdiń baqylaýyna alyndy, dep habarlaıdy QazAqparat tilshisi.
Oblystyq Qoǵamdyq densaýlyq basqarmasynyń málimetinshe, bosaný ýaqyty jaqyndaǵan 22 jastaǵy júkti áıel Kentaý qalalyq ortalyq aýrýhananyń juqpaly aýrýlar statsıonaryna 27 sáýir kúni jatqyzylǵan. Onyń densaýlyǵy tolyq tekserilip, koronavırýsty ınfektsııanyń ortasha dárejedegi aýyrlyq jaǵdaıy rastalǵan. Naýqasta dene qyzýynyń kóterilýi men eki jaqty pnevmonııa, jótel belgileri bolǵan. Gemotransfýzııa jasalynyp, emdeý sharalary jasalǵan.
Nátıjesinde aýrýhananyń bilikti dáriger-reanımatologtary men gınekologtary jáne akýsher quramy júkti áıeldi sátti bosandyryp alǵan. Salmaǵy 3400 gr bolatyn ul bala dúnıege keldi.
«Anasy juqpaly aýrýlar bóliminde em qabyldaýda. Barlyq medıtsınalyq shara Kentaý qalalyq ortalyq aýrýhanasynyń bas dárigeri Gúlbaný Syzdyqovanyń tikeleı basqarýymen júrgizildi. Ana men bala ómirine arasha túsip, jankeshti erlik tanytqan dáriger –gınekolog Gúljan Dúkenbaeva, akýsher Gúlsanam Majıtova, reanımatolog Ysqaq Qanat pen dáriger-ınfektsıonıst Mýhtabar Shermetovaǵa naýqastyń týǵan-týystary alǵystaryn bildirýde», - delingen habarlamada.
