Kentaýda koronavırýs juqtyrǵan 7 áıel aman-esen bosanǵan
KENTAÝ. QazAqparat –Kentaý qalasyndaǵy juqpaly aýrýlar aýrýhanasynda koronavırýs ınfektsııasyn juqtyrǵan 7 áıel aman-esen bosanǵan. Dárigerlerdiń aıtýynsha, analardyń da, sábılerdiń de jaǵdaılary jaqsy, dep habarlaıdy QazAqparat tilshisi.
Atalǵan aýrýhananyń bas dárigeri Gúlbaný Jumaǵalıqyzynyń sózinshe, kalalyq ortalyq aýrýhanadaǵy jaǵdaı turaqtala bastaǵan. Buǵan deıin jedel járdemmen táýligine ortasha eseppen 50-60 adam jetkizilse, qazir bul kórsetkish 10/15-ke deıin azaıǵan.
«Búginde aýrýhanamyzǵa dáriler tolyǵymen jetkizildi. Qazir eki aıǵa jetetin dári-dármek qory bar. Turǵyndar tek talaptardy qatań saqtaýy kerek. Sol kezde ǵana bul indetti tolyq jeńip shyǵa alamyz. Qazir ortalyqqa emhanadan jáne «Jansaıa» shıpajaıynan dárigerler kómekke kelip, aýrýhanada kezekshilikke túsip jatyr», - dedi Gúlbaný Jumaǵalıqyzy.
Bas dáriger sonymen qatar, sanıtarlyq tazalyqty saqtaý kerektigin eskertedi. «Ár adam óz densaýlyǵyn oılap, kópshilik júretin jerlerde qashyqtyqty saqtaǵany jón. Únemi qoldy da jýyp júrýi kerek. Betperde taǵý mindetti. Áleýmettik jeliler arqyly kelgen vıdeolarǵa emes, naqty dárigerlerdiń keńesine júgingen durys».
