Kentaýda qaıta óńdeý zaýyty iske qosyldy
ShYMKENT. QazAqparat - Qazaqstan Respýblıkasy Táýelsizdiginiń 25 jyldyǵyna oraı Ońtústik Qazaqstan oblysynyń Kentaý qalasynda plastıkalyq qaldyqtardy qaıta óńdeıtin jańa kásiporyn iske qosyldy, dep habarlaıdy oblys ákimdiginiń baspasóz qyzmeti.
Jańadan ashylǵan «Statýs Everest» JShS-niń saltanatty sharasyna QR Investıtsııa jáne damý mınıstrligi, kólik komıteti tóraǵasynyń orynbasary Qaırıden Núrkenov, qala ákimi Ábdibaqyt Maqulbaev pen zııaly qaýym ókilderi qatysty. 2014 jyly Kentaý qalasyndaǵy ındýstrıaldy aımaqta qurylysy bastalǵan óndiristik kásiporynnyń smetalyq jobasy 100 mln. teńgeni quraıdy. Atalǵan zaýyt plastıkalyq qatty qaldyqtardy qaıta óńdep, kádege jaratý úshin ekinshi rettik shıkizattyq ónim daıyndaıdy. Daıyn shıkizatty Qazaqstan men Reseı Federatsııasynyń Chelıabi, Ekaterınbor, Máskeý, Samara qalalaryna eksporttaý josparlanyp otyr. Qazirgi tańda atalǵan kásiporynda 25 adam jumys isteıdi. Saǵatyna 300-500 keli kóleminde plastıkalyq qatty qaldyqtardy óńdeýge qaýqarly zaýytta 1 aıda 80-100 tonna qaldyqtardy óńdeýdi josparlap otyr.
Aıta ketý kerek, Kentaý qalasy oblystaǵy óndirisi órkendegen qala qataryna jatady. Munda transformator zaýytynan ózge kóptegen kásiporyndar ashylyp jatyr. Osy joly ashylǵan qaıta óńdeý zaýyty el ekonomıkasynyń eselenýine úles qosatyn bolady.
