Kentaýda qatty turmystyq qaldyqtardy qaıta óńdeıtin kásiporyn iske qosyldy
ShYMKENT. QazAqparat - Ońtústik Qazaqstan oblysynyń Kentaý qalasynda qatty turmystyq qaldyqtardy qaıta óńdeıtin kásiporyn iske qosyldy, dep habarlaıdy qala ákimdiginiń baspasóz qyzmeti.
Elimizde jyl saıyn 1 mlrd. tonnadan astam qatty turmystyq qaldyq jınalady. Biraq, onyń tek 2-3 paıyzy ǵana qaıta óńdeledi. Keıbir qaldyq túrleri bir ǵasyrǵa deıin jer astynda jata beretininin eskersek, qorshaǵan ortaǵa úlken qaýip tónip tur. Túıitkildiń túıinin tarqata túsý úshin Kentaý qalasynda qatty turmystyq qaldyqtardy qaıta óńdeıtin kásiporyn iske qosyldy. Sońǵy, tıptik úlgidegi tehnologııamen jabdyqtalǵan kásiporyn Kentaý qalasynda oryn tepken. Bul jobanyń quny - 100 mln. teńgeni qurap otyr. Kásiporyn jyl saıyn 800 myń tonna turmystyq qatty qaldyqty qaıta óńdeýge qaýqarly. Óndiris ornynda 25 adam jumyspen qamtylǵan. Atalmysh jobaǵa bıýdjetten bir tıyn da bólinbegen. Atalǵan joba jeke ınvestordyń qarjysy esebinen júzege asqan. Kásiporyn óz ónimin Reseı eline eksporttaýdy da josparlap otyr. Al, oǵan qajetti turmystyq qatty qaldyq Ońtústik Qazaqstan oblysynyń túkpir-túkpirinen jáne Qyzylorda oblysynan jetkiziledi. Jalpy, kúl-qoqysty kádege jaratatyn kásiporyndar jerasty sý kózderi men topyraqtyń betki qabatyn búlinýden saqtaıdy. Seriktestik isi nátıjesin berse, óndiris kólemin taǵy ulǵaıtpaq nıette.
