Kentaýda IT jobalar baıqaýynyń jeńimpazdary belgili boldy

KENTAÝ. QazAqparat - Túrkistan oblysynda ótken «Hakaton Yassawi SmartTech» IT jobalar baıqaýy óz máresine jetti. Jarysqa elimizdegi 15 joǵary oqý ornynan 100-ge jýyq úmitker qatysqan, dep habarlaıdy QazAqparat óńirlik kommýnıkatsııalar qyzmetine silteme jasap.

Q.A.ıAsaýı atyndaǵy HQTÝ Kentaý ınstıtýtynda 2 kezeń boıynsha saıystyń bas júldesine S.Toraıǵyrov atyndaǵy Pavlodar memlekettik ýnıversıteti ıe boldy.

Elimizdiń barlyq óńirinen kelgen stýdentterdiń basyn qosqan saıysta Kentaý ınstıtýtynyń dırektory Úsen Rahmetuly qatysýshy stýdentterdi sertıfıkattarmen marapattady.

«Qurmetti qatysýshylar, sizderdiń eńbekterińizdi baǵalaǵan ádilqazy alqalary sheshimderin qabyldady. Incraft kompanııasynan kelgen tóreshiler daryndy jastardyń bilim dárejesin baıqady. IT tehnologııa arqyly jańa baǵdarlamalardyń biregeı joldaryn ázirlep, júzden júırik atanǵan jastardy quttyqtaımyn. Bıik belesterdi baǵyndyra berińizder», - dedi ol.

Eki kúnge sozylǵan jarys Túrkistan qalasynda bastalyp, Kentaýda túıindeldi. Baıqaýdy qorytyndylaý keshinde Almaty qalasyndaǵy «Incraft» kompanııasynan kelgen mamandar 6 aı tegin taǵylymdamadan ótý múmkindigine laıyqty dep S.Toraıǵyrov atyndaǵy Pavlodar memlekettik ýnıversıtet komandasyn tańdady.

Saıysqa qatysýshy ózge de komandalar baǵaly syılyqtarmen marapattaldy.