Kentaýda ımamdardyń dinı biliktiligin arttyrýǵa arnalǵan semınar ótti

ARYS. Qazaqparat – Túrkistan oblysy, Kentaý qalasynda ımamdardyń dinı biliktiligin arttyrýǵa arnalǵan semınar ótti. Basqosýdy Qazaqstan musylmandary dinı basqarmasynyń Túrkistan oblystyq ókildigi men «Din máselelerin zertteý ortalyǵy» uıymdastyrdy, dep habarlaıdy QazAqparat tilshisi.

Oblystyń bas ımamy Musabek Aqtamberdi semınardy ashyp berip, eldegi qoǵamdyq jáne dinı turaqtylyqtyń mańyzdylyǵyna toqtaldy. Turaqtylyqty saqtaýda din qyzmetkerleriniń roli zor ekendigin atap ótti. Qazaqstannyń táýelsizdigin baıandy etýde, túrli dinı uıymdardyń quıtyrqy ıdeologııasyna qarsy turýda, zaıyrly qoǵam prıntsıpterin ulyqtaýda aıanbaı eńbek etýge shaqyrdy.

Oblystyq «Din máselelerin zertteý ortalyǵy» basshysynyń mindetin atqarýshy Medet Halyqov «Abaı Qunanbaıuly jáne Shákárim Qudaıberdiuly eńbekterindegi din máseleleri» taqyrybynda ǵıbratty áńgimelerin aıtyp berdi. Sonymen qatar, kúndelikti ómirimizde oryn alatyn dinı máselelerdi quqyqtyq jáne dinı turǵydan túsindirip berdi.

«Din máselelerin zertteý ortalyǵy» ońaltý jumystaryn júrgizý bóliminiń meńgerýshisi Murat Mustafaev kereǵar dinı aǵym yqpalynan saqtaný joldaryn, ol ıdeologııanyń yqpalyna túsken azamattardy dástúrli jolǵa beıimdeý tásilderin tereńinen túsindirdi.

Salıqaly semınar sońynda Musabek Aqtamberdi meshit moldalarynyń suraqtaryna jaýap berip, óz bilimderin udaıy jetildirip otyrýdy, din qyzmetkerleri arasyndaǵy aýyzbirlik pen yntymaqtastyqty berik etip ustaý qajettigin atap ótti.