Kentaýda gaz jarylysynan 1 adam qaza taýyp, 4 adam aýrýhanaǵa jetkizildi
TÚRKІSTAN. KAZINFORM — Túrkistan oblysynyń Kentaý qalasynda kópqabatty turǵyn úıdiń birinshi qabatynda ornalasqan qoǵamdyq tamaqtaný ornynda gaz-aýa qospasynyń jarylysy bolyp, sonyń saldarynan órt shyqty.
Órt sóndirý bólimsheleriniń kúshimen tilsiz jaý jedel túrde aýyzdyqtaldy.
— Oqıǵa saldarynan 1 adam qaza tapty. Taǵy 4 adam aýrýhanaǵa jetkizildi, olardyń 2-eýi jansaqtaý bóliminde jatyr. Olar tolyq medıtsınalyq baqylaýda, — delingen oblys ákimdigi taratqan aqparatta.
Oblys ákimi Nuralhan Kósherov oqıǵa ornyna baryp, jaýapty qyzmet ókilderimen jedel keńes ótkizip, jaǵdaıdy jeke baqylaýyna aldy. Jedel shtab quryldy.
Atalǵan derek boıynsha qylmystyq is qozǵalyp, tergeý amaldary júrgizilip jatyr.
Budan buryn Túrkistan oblysyndaǵy kóppáterli turǵyn úılerdiń birinde gaz jarylysy bolǵanyn jazǵan edik.