Kentaýda fast-fýdtan ýlanǵandar sany 92-ge jetti
Kentaý qalasynda ornalasqan «Rızyq-Raýany» fast-fýd ortalyǵynda tamaqtan ýlanǵandar sany 92-ge jetti. Olardyń ishinde 14 jasqa tolmaǵan 40 jasóspirim, 3 júkti áıel bar.
Qazirgi kezde atalǵan jaǵdaı negizinde Kentaý qalalyq polıtsııa bólimi qylmystyq is qozǵap, sotqa deıingi tergep-tekserý júrgizip jatyr.
Jalpy dene qyzýy joǵarylaǵanyn, qusyp, ishiniń ótkenin aıtyp shaǵymdanǵan turǵyndar 27-shi maýsymnan bastap aýrýhanaǵa túse bastaǵan. Olardyń barlyǵy bir dámhanadan tamaq jegen.
Atalǵan tamaqtaný ornynda jappaı ýlaný jaǵdaıy osymen 3-shi ret tirkelip otyr. Ótken jyldyń tamyz aıynda 8 adam, qazan aıynda 168 adam fast-fýdtan ýlanyp qalǵan bolatyn. Al, bul joly 92 adam zardap shekti.
Sanıtarııalyq-epıdemıologııalyq baqylaý qyzmeti tarapynan zań aıasynda tıisti sharalarda qabyldanǵan.
Birinshi jaǵdaıda jeke kásipkerge 230 AEK aıyppul salynyp, quqyq buzýshylyqty joıý týraly uıǵarym berilgen.
Ekinshi jaǵdaıda QR Qylmystyq Kodeksiniń 304-baby 1-bóligimen Kentaý qalalyq polıtsııa bólimimen sotqa deıingi tergep-tekserý boıynsha qylmystyq is qozǵalǵan. Qylmystyq istiń qaýlysy negizinde SEBB tarapynan jospardan tys tekserý taǵaıyndalyp, nátıjelerinde kóptegen kemshilikter anyqtalǵan.
Qoǵamdyq tamaqtaný ornynyń ıesi kúdikti retinde tanylyp, onyń is áreketinde qylmystyq quqyq buzýshylyqtyń quramy bar dep tanylǵan. Degenmen, jábirlenýshilermen tatýlasýyna baılanysty, qylmystyq is toqtatylǵandyǵy jóninde Kentaý qalalyq polıtsııa bólimi qaýly shyǵarǵan.
Sodan Kentaý qalalyq sanıtarııalyq-epıdemıologııalyq baqylaý basqarmasy tarapynan qoǵamdyq tamaqtaný ornynyń ıesi jeke kásipker J.Tajıbaıulyna ákimshilik quqyq buzýshylyq týraly hattama toltyrylyp, is-qujattar Kentaý qalalyq sotyna joldanǵan.
Osy 3 jaǵdaıdy negizge alǵan Kentaý qalalyq polıtsııa bólimi QR Qylmystyq Kodeksiniń 304-baby 1-bóligimen sotqa deıingi tergep-tekserý boıynsha qylmystyq is qozǵady. Nátıjesinde kóptegen kemshilikter anyqtaldy.
«Nysan qyzmetkerleri aldyn ala profılaktıkalyq medıtsınalyq tekserýden tolyq ótpegen. Jumys jasaıtyn 20 qyzmetkerdiń tek 12-de ǵana medıtsınalyq kitapshalary bar. Shıkizat pen ónimniń qaýipsizdigin kýálandyratyn qujattary tolyq emes, ónimderdi saqtaý kezinde olardyń taýarlyq kórshilestigi saqtalmaǵan, ıaǵnı et ónimderi, qus eti ónimderi, sút ónimderi, kókónister men jemister, barlyǵy bir tońazytqyshta aralasa saqtalǵan. Qyzmetkerlerdiń jeke jáne arnaıy kıimderin, jeke zattaryn saqtaýǵa arnalǵan oryn qarastyrylmaǵan. Jumyrtqany saqtaýǵa, jýyp óńdeýge arnalǵan arnaıy ydys bólinbegen, ónimderdiń jaramdylyq merzimderi ótken. Zerthanalyq zertteýge alynǵan synamalar jumys ústinde» - delingen Túrkistan oblysy sanıtarııalyq-epıdemıologııalyq baqylaý departamentiniń baspasóz qyzmeti taratqan aqparatta.
Aıta keteıik, budan aldyn Kentaýda dámhanadaǵy astan 58 adam ýlanyp qalǵanyn jazǵan bolatynbyz.
