Kentaýda eń uzyn Konstıtýtsııa kitabyn jasaǵan ustaz turady
Turar Mádenıetuly 2014 jyly QR Konstıtýtsııasy kúnine oraı eń uzyn Konstıtýtsııa kitabyn jasap shyqty. Uzyndyǵy 200 metr, eni 80 santımetr bolatyn kitap Shymkenttegi baspahanada basyldy.
«Tek baspadan basyp shyǵarýdyń ózine 12 saǵat ýaqyt ketti. Onyń jıekterin jabystyrýǵa 10 kúndeı ýaqyt jumsadym. Qazaq jáne orys tilderinde jasalǵan kitap 200 paraq boldy. Birde-bir qatesi joq. Keıin kitapty Kentaýdaǵy Táýelsizdik alleıasynda arnaıy jaıyp, turǵyndardyń nazaryna usyndym», – deıdi ol.
2015 jyly Turar EAEO músheligine engen elderdiń astanalaryna baryp keldi. Eshqandaı demeýshi izdemeı-aq, jylyna bir ret alatyn eńbek demalysynyń aqshasyn el, jer kórýge jumsady.
«Jazǵy eńbek demalysymdy aldym da birden astanaǵa jol tarttym. Keıin Máskeý men Mınskige baryp keldim. Alǵashqyda bir ózim bolǵandyqtan azdap qobaljydym. Keıinnen boıym úırenip ketti. Qala ortalyqtarynda júrip elimiz jaıynda aqparattar jazylǵan kitapshalardy, gazetterdi jáne jalaýshalarymyzdy tarattym. Qarııalarmen áńgimelesip, Qazaqstan týraly aıtyp berdim. Olarda bizdiń elimiz týraly jaqsy pikir bildirdi. Sapardan alǵan áserim keremet. El kórdim, jer kórdim. Kóptegen máselelerdi kóńilge túıdim. Kórikti jerlerdi fotoǵa túsirip, Kentaýǵa kelgen soń arnaıy fotokórme ótkizdim», – deıdi erikti.
Turar Omarov Kentaý qalasyndaǵy Y.Altynsarın atyndaǵy №1 mektepte jumys isteıdi. Qyzmetin qarapaıym muǵalimdikten bastaǵan ol, búginde mektep dırektorynyń tárbıe isi jónindegi orynbasary qyzmetin atqarýda. Odan bólek tarıh sabaǵynan dáris beredi. Qoǵamdyq jumystarǵa da belsene aralasady.
Máselen, ótken jyly oqýshylar arasynan eriktiler tobyn qurdy. Sodan, jas eriktilermen birge ardager ustazdardyń úılerine baryp, qarııalardyń úı-ishilik sharýalaryn atqarýǵa qolǵabys etti. Sondaı-aq, jas ustaz tarıh pánine arnalǵan test kitapshasyn da qurastyryp qoıǵan. Aldaǵy ýaqytta ony da jaryqqa shyǵaryp, oqýshylarǵa tegin taratýdy josparlap otyr.
«Jalpy jastarmen jumys elimizde jaqsy jolǵa qoıylǵan. Tárbıeli, bilimdi jastar ósip keledi. Degenmen, «bir qaryn maıdy, bir qumalaq shiritedi» demekshi, arasyndaǵy keıbir buzyqtyń bir isi búkil jumysty joqqa shyǵaratyny bar. Olardyń da tárbıesin túzeý maqsatynda kóptegen jumys júzege asyrylyp jatyr. Qazir, bala tárbıesimen Ákeler keńesi, Analar keńesi, mektep, ata-analar jumys istep jatyr. Jalpy, mektepte er muǵalimderdiń azdyǵy da bala tárbıesine kóp áser etedi dep oılaımyn. Sondyqtan, bilim ordalarynda er muǵalimderdi kóbeıtý qajet» - deıdi ustaz.
Turar Mádenıetulynyń ustazdyq jolda jetken jetistikteri kóp. 2014 jyly qalalyq tarıh páni muǵalimderi arasynda ótken qalalyq olımpıadada II oryn, 2019 jyly tárbıe isi salasy qyzmetkerleriniń arasynda ótken baıqaýda I oryn, 2020 jyly muǵalimder arasynda ótken qalalyq pán olımpıadasynda III oryndy jeńip aldy.
Kentaý qalasynyń 65 jyldyǵyna oraı merekelik medalmen marapattaldy.
«Búgingi ustaz jańashyldyqqa beıim bolýy kerek. Aqparattyń sát saıyn ózgerip jatqan tusta qoǵammen baılanysty úzýge bolmaıdy. Sondyqtan árbir jańalyqtan habardar bolyp, qoǵamdyq isterge aralasyp otyrǵan durys. Qazir jaǵdaı jaqsy. Ustazdarǵa memleketimizde úlken qoldaý kórsetilýde. Jalaqylary da joǵarylap keledi. Testten ótip, deńgeıin kótergen, biliktiligin joǵarylatyp, jaqsy jumys istegen ustazdar joǵary jalaqy alýda. Sondyqtan, tek jaqsy jumys jasaý kerek» - deıdi Turar Omarov.
