Kentaýda eki jasóspirim tóbelesip, bireýi ekinshisine pyshaq salǵan
TÚRKІSTAN. QazAqparat – Túrkistan oblysy Kentaý qalasy mańyndaǵy aýylda eki jasóspirim tóbelesip qalǵan. Mektep oqýshylarynyń biri ekinshisine pyshaq jaraqatyn salǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, pyshaq jaraqatyn alǵan jasóspirim Túrkistan qalasynyń balalar aýrýhanasyna jetkizilgen. Oqıǵa ornyna shuǵyl jetken polıtseıler jasóspirimder arasyndaǵy tóbeles 22 maýsym kúni bolǵanyn anyqtaǵan. Ári jasóspirimder bolǵan oqıǵany jasyrýǵa tyrysqany belgili boldy.
«Qazirgi ýaqytta atalǵan jaıt QR QK 24-99 baby «Adam óltirýge oqtalý» boıynsha tirkelip, sotqa deıingi tergeý amaldary júrgizilýde. Jábirlenýshiniń jaǵdaıy turaqty, ol palataǵa aýystyrylǵan. Al kúdikti qamaýǵa alynyp, oqıǵanyń tolyq mán-jaıy anyqtalýda» delingen habarlamada.
