Kentaýda buryn sottalǵan turǵyn 9 mln teńgeniń altynyn urlap, taǵy isti boldy
TÚRKІSTAN. KAZINFORM – Kentaý qalasynda 9 mıllıon teńge turatyn altyn buıymdardy urlaý deregi ashyldy.
Kentaý qalalyq polıtsııa bólimine jergilikti turǵyn aryzdanǵan. Onyń aıtýynsha, belgisiz adamdar zergerlik sheberhana-dúkenniń esigin buzyp kirip, altyn buıymdaryn urlap ketken. Keltirilgen shyǵyn – shamamen 9 mıllıon teńge.
Tergeý barysynda polıtsııa qyzmetkerleri beınebaqylaý kameralarynyń jazbalaryn jáne ózge de aıǵaqtardy zerdelep, kúdiktiniń jeke basyn anyqtady.
– Jedel-izdestirý is-sharalary nátıjesinde buryn sottalǵan jergilikti turǵyn ustaldy. Kúdiktiniń turǵylyqty mekenjaıynda júrgizilgen tintý kezinde urlanǵan múliktiń bir bóligi men ózge de zattaı aıǵaqtar tárkilendi. Qazirgi ýaqytta atalǵan derek boıynsha sotqa deıingi tergeý amaldary júrgizilip jatyr. Kúdikti ýaqytsha ustaý ızolıatoryna qamaldy, – delingen oblystyq Polıtsııa departamenti taratqan aqparatta.
Buǵan deıin Túrkistan oblysynda nemeresi ájesiniń 3 mln teńgesi men áshekeılerin urlap ketkenin jazǵan edik.