Kentaýda bir mektep pen bir balabaqsha paıdalanýǵa berildi - OQO
ShYMKENT. QazAqparat - Ońtústik Qazaqstan oblysynyń Kentaý qalasynda QR Táýelsizdiginiń 25 jyldyǵy men bilim kúnine oraı 200 oryndyq mektep pen 100 oryndyq balabaqsha ashylyp, el ıgiligine tapsyryldy.
Baıyldyr aýylynda ornalasqan №9 S.Qojanov atyndaǵy jalpy orta mektep jańa zamanaıý úlgide salynǵan. Bilim ordasynyń ashylý saltanatyna qatysqan qala ákimi Á.Maqulbaev pen oblystyq «Jastar saıasaty» basqarma basshysy B.Janábil aýyl turǵyndaryn bilim kúnimen quttyqtap, ustazdar men oqýshylarǵa jańa oqý jylynda sáttilik tiledi.
Munda balalardyń kedergisiz bilim alýyna barlyq jaǵdaı qarastyrylǵan. Máselen, salqyn, ystyq sý, ınteraktıvti taqtalar, ul-qyzdarǵa arnalǵan eńbekke baýlý qurylǵylary men baqylaý beıne kameralary ornatylǵan.
Mereke qarsańynda turǵyndardy qýanyshqa bólegen ekinshi nysan 100 oryndyq búldirshinderge arnalǵan «Ertóstik» balabaqshasy. Qalanyń ishinde bos turǵan ǵımaratty mektepke deıingi bilim berý mekemesine yńǵaılastyryp, paıdalanýǵa berildi. Ǵımaratta balalarǵa arnalǵan barlyq qural jabdyqpen qamtamasyz etilgen.
Aıta keteıik, bıyl Kentaý qalasynda jalpy mektepke baratyn oqýshy sany 16 138 qurap otyr. Onyń ishinde 1-shi synypqa baratyn bala sany 1 919 bolsa, 11-shi synypqa baratyn oqýshy sany 655. Ótken jylmen salystyrǵanda mektepke kelýshi bala sany 20 paıyzǵa ósken.
