Kentaýda balalardyń shyǵarmashylyq ortalyǵy ashyldy

ASTANA. QazAqparat - Ońtústik Qazaqstandaǵy Kentaý qalasynda «Astana kúni» merekesine oraı jańa nysan paıdalanýǵa berilip, balalarǵa arnalǵan shyǵarmashylyq úıi ashyldy, dep habarlaıdy ákimniń baspasóz qyzmeti.

Saltanatty jıynǵa qatysqan qala ákimi Á.Maqulbaev alǵy sózinde aýyl turǵyndaryn memlekettik mereke - Astana kúnimen quttyqtap ótti. Jıynǵa qala ákimi bastaǵan zııaly qaýym ókilderi men máslıhat depýtattary, ardagerler músheleri, aýyl turǵyndary qatysty.

Jańa nysannyń lentasyn 97-jasqa kelgen UOS ardageri Hantaǵy aýylynyń turǵyny Oryntaı Mahambetov qıyp, jaqsylyqqa bastar ıgi ister kóp bolsyn dep batasyn berdi. Jıynǵa qatysýshylar ashylý rásiminen soń ǵımaratty aralap, tanysyp shyqty.

Negizinen, atalǵan ǵımarat 1938 jyly "Aşysaıtústimetal" kombınatynyń alǵashqy basqarý organdary ornalasqan ǵımarat retinde paıdalanýǵa berilgen bolatyn. Bertin kele 1960 jyldardan bastap Hantaǵy aýylyndaǵy qyzmet kórsetý úıine aınalady. Osy ýaqytqa deıin ǵımarat bos turyp,  qoldanýsyz keldi.

2016 jyly Hantaǵy aýyly ákimi apparaty basshylyǵynyń tıisti smetalyq qujattardy jasatýynyń nátıjesinde, "Balalar shyǵarmashylyq úıine" jergilikti bıýdjetten 58 000 000 mln. teńge qarjy qaralyp, kúrdeli jóndeý jumystary júrgizildi.

Osy jumystardyń atqarylýyna qala ákimi Á. Maqulbaev pen qalalyq máslıhat depýtattarynyń tikeleı yqpaly zor bolǵanyn aıta ketý kerek. Búginde atalmysh ǵımarat aýyl turǵyndaryna qyzmet etý úshin esigin aıqara ashty. Endi bul ǵımaratta aýyl ákimdiginiń apparaty men mektep oqýshylaryna arnalǵan úıirmeler jumys jasaıtyn bolady.