Kentaýda aýyl turǵyny mas kúıinde zırattaǵy sadaqa jáshiginen aqsha urlaǵan
TÚRKІSTAN. QazAqparat - Túrkistan oblysynyń polıtseıleri sadaqa jáshigin urlaǵan kúdiktilerdi ustady, dep habarlaıdy QazAqparat oblystyq polıtsııa departamentine silteme jasap.
Túrkistan qalalyq polıtsııa basqarmasyna oblys ortalyǵynyń turǵyny aryzdanyp, tańǵy ýaqytta belgisiz bireý aýyldyq meshittiń sadaqa jáshigine urlyqqa túskenin jetkizdi. Oqıǵa ornyna shuǵyl jedel-tergeý tobynyń qyzmetkerleri shyqty.
Polıtsııa qyzmetkerleriniń anyqtaýynsha, urylar ashyq turǵan esikti paıdalanyp, meshitke kirip, sadaqaǵa arnalǵan metall jáshigin ashyp, ishinen aqsha urlap ketken.
Atalǵan jaıt QR Qylmystyq kodeksiniń 188-baby boıynsha sotqa deıingi tergep-tekserýdiń biryńǵaı tizilimine tirkeldi.
Jedel izdestirý sharalary nátıjesinde Túrkistan qalalyq PB polıtsııa qyzmetkerleri meshittegi urlyqqa qatysy bar kúdiktini quryqtady. Ol Shardara aýdanynyń turǵyny bolyp shyqty. Kúdikti polıtsııa basqarmasyna jetkizildi.
Qazirgi ýaqytta atalǵan derek boıynsha sotqa deıingi tergeý amaldary júrgizilip jatyr.
Osyǵan uqsas taǵy bir qylmysty Kentaý qalalyq polıtsııa bóliminiń qyzmetkerleri ashty. Kezekshi bólimge irgeles jatqan aýyl turǵyny shaǵym túsirip, jergilikti zırattan beıtanys adam sadaqa jáshiginen aqsha urlap ketkenin jetkizgen.
Oqıǵa ornyna jetken Kentaý qalalyq PB jedel-tergeý toby shuǵyl áreket etti. Urylar barlyǵy 12 myń teńge kóleminde aqshany alyp ketken. Atalǵan jaıt QR Qylmystyq kodeksiniń 188-baby boıynsha tirkelip, polıtseıler kúdiktini izdestirýge kiristi.
Kentaý polıtseıleri kúdikti retinde atalǵan aýyldyń turǵynyn ustady. Tergeý barysynda er adam mas kúıinde túngi ýaqytta zırat aýmaǵyna kirip, sadaqaǵa arnalǵan jáshikti ashyp, ishinen aqsha alyp, odan keıin qylmys ornynan boı tasalap ketkeni anyqtaldy.
Aıǵaq retinde kúdiktiden urlanǵan aqsha alyndy.
Osy derek boıynsha sotqa deıingi tergeý amaldary júrgizilip jatyr. Er adam qolhatpen bosatyldy.
Polıtsııa qyzmetkerleri er adamnyń basqa da osyǵan uqsas qylmystarǵa qatysy bar-joǵyn anyqtap jatyr.
Túrkistan oblysynyń polıtseıleri qyraǵy bolyp, múlikti qaraýsyz qaldyrmaý qajettigin eskertedi. Baǵaly zattar urlanǵan nemese joǵalǵan jaǵdaıda tez arada «102» telefony boıynsha polıtsııa kómegine júginý kerek.
Foto: Aktobenews.kz
