Kentaýda aýyl turǵyny aýlasynda túıequs ósirip otyr

KENTAÝ. QazAqparat - Kentaý qalasy Iassy aýylynyń turǵyny Nálipan Myrzaqulov óz aýlasynda túıequs ósirip otyr, dep habarlaıdy QazAqparat óńirlik kommýnıkatsııalar qyzmetine silteme jasap.

Búgingi tańda qustyń sany balapandarymen qosqanda 19-ǵa jetken. Sharýa qustyń tuqymyn kóbeıtip, ony kásip kózine aınaldyryp otyr. Aýlasyna arnaıy qorshaý jasatyp, sol jerde baǵady.

«Bul - óte paıdaly qus. Eti delıkates. Qaýyrsyny da emge daýa. Jumyrtqasy baǵaly, kórinisi de ásem» - deıdi sharýa Nálipan Myrzaqulov.

Atalmysh túıequs - avstralııalyq tuqym. Olardyń jumyrtqasy erekshe qara tústi bolady. Al, afrıkalyq túıequstyń jumyrtqasy aq bolyp keledi.

Bul qusty qolǵa úıretý asa qıyn sharýa emes. Tez jersinedi. Shól jerlerde de tózimdi. Jemshóbi ýaqytyly berilip otyrsa, paıdasy – kól-kósir.

Jumyrtqasynyń 1 danasy - 5-10 myń teńge shamasynda. Etinde holesterın joq. Júrek aýrýyna paıdaly.

Bul qus 40-50 jyldan astam ómir súredi. Sharýasyn dóńgeletip otyrǵan kásipker aldaǵy ýaqytta qustyń basyn kóbeıtýdi josparlap otyr.