Kentaýda alaıaq aýyldasynyń 160 bas malyn aldap alyp ketken
KENTAÝ. QazAqparat – Túrkistan oblysy Kentaý qalasynda iri kólemde alaıaqtyq jasaý deregi anyqtaldy. Kúdikti aýyldasynyń malyn satyp beremin dep, 160-tan astam iri qarasyn aldap alyp ketken, dep habarlaıdy QazAqparat tilshisi.
Oblystyq PD departamentiniń málimetinshe, alaıaqqa aldanǵan turǵyn polıtsııaǵa aryzdanǵan. Onyń sózinshe, alaıaq tanysy 2017 jyly oǵan «sıyrlary men buqalaryńdy satýǵa kómektesemin» dep ýáde bergenin aıtqan. Sodan beri kúdikti mal ıelerine aqshasyn da, malyn da qaıtarmaǵan. Jábirlenýshige keltirilgen shyǵynnyń jalpy kólemi 45 mıllıon teńgeni quraǵan. Kúdiktini anyqtaý maqsatynda polıtsııa qyzmetkerleri qajetti izdestirý sharalaryn júrgizip, qolǵa túsirgen. Ol da jergilikti turǵyn bolyp shyqty. Jaýap alý barysynda ol óz kinásin tolyq moıyndap, aýyldasynyń malyn satyp jibergenin aıtqan. Al, aqshany óz qajettine jumsaǵan.
«Qazirgi tańda osy jaıt QR QK-niń 190-babynyń 4-bóligimen («Alaıaqtyqpen») tirkelip, sotqa deıingi tergeý amaldary júrgizilýde. Er adam qamaýǵa alyndy» delingen habarlamada.
