Kentaýda Alash arysynyń nemere inisi, atasymen attas Sultanbek Qojanov turady
Kishi Sultanbek Qojanov alash arysynyń inisi Seıdollanyń kenje balasy bolyp keledi.
«Arda uldyń aty óshpesin» dep ákesi esimin Sultanbek Qojanov qoıǵan.
Búginde kishi Sultanbektiń ul-qyzdary atasy jaıly óleńderdi, qarasózderdi jattap alǵan. Mektebinde úlken maqtanyshpen aıtyp júredi.
«31 mamyr – saıası qýǵyn-súrgin qurbandaryn eske alý kúninde jáne atam men ákemniń qaıtys bolǵan kúninde aǵaıyn-týysty jınap, arýaǵyna jyl saıyn quran baǵyshtap turamyz. Atam Sultanbek Qojanovtyń jerlengen jeri Máskeý shetindegi «Kommýnarka» zıratynan tabylǵanda áýletimizben qatty qýandyq. Eldi jınap as berdik. Arnaıy delegatsııa týǵan jeri Aqsúmbeniń topyraǵyn zıratyna salyp keldi. Keıinnen kitap shyǵardyq. Endigi armanym - atam men ákemniń ómirinen syr shertetin kıno túsirsek deımin», – deıdi atasymen attas Sultanbek Qojanov.
Sultanbek búginge deıin ákesi men atasy jaıly birshama málimetterdi jınaǵan.
Kitap jazdyryp ta kópshilikke usynypty. Bar maqsaty - atasy men ákesi týraly tyń derekterdi tolyqtyryp, eńbegin nasıhattaý.
«Ákem aǵasy Sultanbek jaıynda kóp aıtyp otyratyn. Eldi asharshylyq jaılaǵan kezde ol 12-13 jasar bala bolypty. Temir torǵa qamalardyń aldynda inisi aǵasymen bir táýlik boıy sóılesken eken. Sodan erteńine túnde eki soldat kelip atamdy alyp ketken. Alǵashynda aýdandyq túrmede bir aıǵa jýyq jatypty. Keıin qaıda ketkeni belgisiz», - deıdi ol.
Keıinnen bala Sultanbektiń ákesi Seıdollany da Sozaqtan ustap, Qaraǵandynyń túrmesine deıin jaıaý alyp barǵan. Odan jer aýdaryp Sibirge jibergen.
Jaratýshy jar boldy ma, Seıdolla Qojanov sol kezdegi atý jazasynan aman qalypty.
Túrmeden bosaǵan soń týǵan jeri Aqsúmbege oralady. Arada birshama ýaqyt ótken soń Kentaý qalasyna qonys aýdarǵan.
Sonda kóp jyldar boıy shahtada jumys istep, zeınetke shyqqan.
Qoǵam qaıratkeriniń nemere inisi Sultanbek Qojanov qazir Kentaý transformator zaýytyndy qyzmet atqarady. Negizgi mamandyǵy - qurastyrýshy.
Al bos ýaqytynda kitaphanaǵa baryp atasy men ákesi jaıyndaǵy estelikterdi jınaqtaýmen shuǵyldanady. Ǵylymı konferentsııalarǵa qatysyp, tyń málimetter izdeıdi.
Búgin Sultanbek Kentaý qalasynda ótken saıası qýǵyn-súrgin qurbandaryn eske alý sharasyna qatysty.
Kópshilikke atasy týraly áserli estelikterin bólisip, ómiri jaıynda aıtyp berdi.
Kentaý qalasynyń ákimi Jandos Tasovpen birge atasy S.Qojanovtyń eskertkishke gúl shoqtaryn qoıdy.
