Kentaýda 120-dan astam kóshe jóndelip jatyr
KENTAÝ. QazAqparat - Túrkistan oblysy Kentaý qalasynda 122 kóshege jóndeý jumystary júrgizilip jatyr. Onyń ishinde jalpy uzyndyǵy 26 shaqyrymdy quraıtyn 11 kósheniń qurylysy «Jumyspen qamtý – 2020» jáne «Jol kartasy» baǵdarlamalary aıasynda júzege asyrylýda, dep habarlaıdy QazAqparat óńir basshysynyń baspasóz qyzmetine silteme jasap.
Al 96 kósheniń jóndeý jumystary memlekettik-jekeshelik áriptestik aıasynda atqarylyp jatyr. Onyń 37-si aǵymdaǵy, 48 kóshe ortasha jóndeýden ótpek.
Jalpy Kentaý qalasyndaǵy birqatar joldardyń tozyǵy jetken. Jańbyr jaýǵan kúnderi kóshelerdi sý basyp, turǵyndarǵa qolaısyz jaǵdaı týyndatyp jatatyny jasyryn emes. Osy atalǵan máseleni ońtaıly sheshý maqsatynda qala kóshelerine aǵymdaǵy jáne ortasha jóndeý jumystary júrgizilip jatqanyn aıtady jaýapty mamandar. Jóndeýden ótkizilip jatqan kóshelerge sýaǵarlar men aıaq joldar salynýda.
Aıta keteıik, Kentaý qalasynda 2020 - 2025 jyldar aralyǵynda jalpy uzyndyǵy 101,7 shaqyrym bolatyn 142 ishki oram kóshege aǵymdaǵy, ortasha jáne kúrdeli jóndeý jumystary júrgiziletin bolady.
