Kentaýda 1 tonna baýyrsaq taratyldy
TÚRKІSTAN. KAZINFORM- Búgin Túrkistan oblysyndaǵy aýdan, qala turǵyndary Áz-Naýryz merekesin atap ótip jatyr.
Ulystyń Uly kúni - Naýryz merekesi Kentaý qalasynda joǵary deńgeıde ótti. Qala turǵyndary men qonaqtary ortalyq alańǵa ornatylǵan kıiz úılerde naýryz kóje iship, naýryz dámnen dám tatty. Al, jastar qol kúres, arqan tartý, qazaqsha kúres, kir tasyn kóterý sekildi ulttyq sporttyq oıyndarǵa qatysyp, baq synady. Ásem ánder oryndap kórermenderdiń yqylasyna bólendi.
«Baýyrsaq fest» aıasynda qala turǵyndaryna 1 tonnaǵa jýyq baýyrsaq taratyldy. Aspazdar ulttyq taǵam ázirleýden saıysqa tústi.
Qoshqar kóterý jarysyna da qatysýshylar kóp boldy. Saıys tartysty da qyzyqty ótti. 36 kelilik qoshqardy 186 ret kótergen Kentaý gýmanıtarlyq tehnıkalyq kolledjiniń ustazy Ádilbek Qaıyrbekov bas júldeni ıelenip, qoshqardy syıǵa aldy.
Sáni men saltanaty jarasqan sahnada qala ákimi Jandos Tasov pen qalalyq máslıhat tóraǵasy Qablan Eleýsizov kópshilikti naýryz merekesimen quttyqtady.
Іs shara merekelik kontsertpen jalǵasty.
