Kentaý jylý elektr ortalyǵynda ortasha jalaqy - 166 myń teńge

KENTAÝ. QazAqparat - Aldaǵy jylytý maýsymyna daıyndyq jumysyn úılestirý shtabynyń jumysy sheńberinde Energetıka mınıstri Almasadam Sátqalıev «Kentaýservıs» MKK qarasty 5 Kentaý jylý elektr ortalyǵyna bardy, dep habarlaıdy QazAqparat.

Onda mınıstr energetıkalyq jabdyqtyń aǵymdaǵy jaı-kúıimen, jóndeý naýqanynyń barysymen tanysty.

Energııa kásipornynyń basshylyǵymen kezdesý barysynda jylytý maýsymynyń ózekti máseleleri, onyń ishinde qazandyqtardyń apatty toqtap qalýynyń aldyn alý, aldaǵy jylytý maýsymyna daıyndyq, jóndeý jumysyn ýaqtyly, sapaly júrgizý máselesi talqylandy.

Bıyl №5, 6, 7, 12 qazandyqtarda aǵymdaǵy jóndeý, №8, 9, 11 qazandyqtarda gaz tyǵyzdaǵysh ottyqqa aýystyra otyryp qaıta jańartý, al №10 qazandyq boıynsha 2024 jyly aıaqtalýy josparlanǵan jumystyń uqsas kólemi josparlanǵan.

Smetalyq quny - 13,7 mlrd teńge, onyń ishinde oblystyq bıýdjetten bul jumysqa 1 mlrd teńge bólindi.
Búgingi kúni qaıta qurý boıynsha № 9, 10 qazandyqtardyń qaptamasyn demontaj jumystary bastaldy.

Sondaı-aq «KentaýServıs» MKK men «EM-Holdıng» JShS arasynda № 5, 6 qazandyqtardy aǵymdaǵy jóndeý jumystaryna memorandým jasaldy.

№5, 6 qazandyqtar aǵymdaǵy jóndeýden ótip jatyr.

Stantsııa jumysynyń turaqtylyǵyn jaqsartý úshin №7, 12 qazandyqtardy aǵymdaǵy jóndeýge memorandým jasaldy.

№7, 12 qazandyqtarda dıirmenderdiń brondaryn, tútin sorǵyshty, tómengi kollektordan tómengi bekitýge deıingi ekran qubyrlaryn, JQP bólshekteý boıynsha jumys júrip jatyr.

Júrgizilgen rekonstrýktıvtik jumystardy eskere otyryp, JEO negizgi jabdyqtarynyń tozýy - 87%.

Qazirgi ýaqytta kásiporynda ortasha jalaqy - 166 myń teńge.

Jalaqyny 200 myń teńgege deıin ulǵaıtý máselesi qarastyrylyp jatyr.

Esterińizge sala keteıik, jaqyn arada Almasadam Sátqalıev Rıdder, Ekibastuz, Almaty jáne oblys, qalalda jumys saparymen kelip, JEO-nyń aldaǵy jylý maýsymyna daıyndyǵyn tekseredi jáne óńirlerdiń turǵyndarymen kezdesedi.