«Kentaý – jer jánnaty»: Turǵyn qalanyń qysqy kórinisi beınelengen sýretter jarııalady
TÚRKІSTAN. KAZINFORM – Kentaýlyq turǵyn qysqy keıipke engen kenshiler qalasynyń sýretterin jelige júktep, #Qazalemi heshtegimen jarııalaǵan baıqaýǵa qatysty.
Janna Ámirhanqyzy áleýmettik jelide belsendi. Árdaıym ózi turatyn qaladaǵy jańalyqtarmen bólisip otyrady. Sondaı-aq, jelige maǵynaly jazbalar jarııalap, oramdy oılaryn ortaǵa salyp turady. Sondyqtan bolar, Jannany jergilikti turǵyndar men áriptesteri qala janashyry dep biledi.
– Kentaý qalasy men úshin jer jánnaty dep bilemin. Munda ózim eńbek etip jatyrmyn. Ul-qyzdarym balabaqshada, mektepte sabaq oqyp, bilimderin jetildirý ústinde. Kentaýda ósip óndim, jastyq shaǵym ótti. Osynda kelin bolyp tústim. Sondyqtan qala men úshin óte ystyq, - deıdi ol.
Jannanyń Instagram jelisinde #Qazalemi heshtegimen jarııalaǵan sýretterinen Kentaý qalasynyń qysqy keıipke oranǵan kóshelerin kórýge bolady.
Aıta keteıik, buǵan deıin tanymal akter ári prodıýser Nurlan Qoıanbaev Instagram jelisindegi paraqshasynda Qazaqstannyń Táýelsizdik kúnine oraı baıqaý uıymdastyrǵan bolatyn.
Qatysýshylar óz aımaǵyndaǵy qys kelbetin jáne qysqy, kórikti jerlerdi sýret pen vıdeoǵa túsirip, #Qazalemi heshtegimen áleýmettik jelige júkteýi qajet.
Eń kreatıvti jumystardyń avtorlaryna syılyqtar — jańa smartfondar men shıpajaıǵa joldama beriledi. Baıqaý qorytyndysy 27 jeltoqsanda jarııalanady.
Aıta keteıik, budan buryn týǵan jerdiń tabıǵatyn áleýmettik jeli arqyly tanytyp júrgen Tólebı aýlanynyń turǵyny jaıynda jazǵan bolatynbyz.