Kentaý jastary latyn álipbıine ótýdi qoldaıdy

ShYMKENT. QazAqparat - Ońtústik Qazaqstan oblysy, Kentaý qalasynyń jastary latyn álipbıine ótýdi biraýyzdan qoldady. «Jastar resýrstyq ortalyǵynda» ótken dóńgelek ústelde «Latyn álipbıiniń negizi» máselesi talqylandy, dep habarlaıdy QazAqparat tilshisi.

Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda latyn álipbıine kóshý bastamasyna jastar da osylaısha qoldaý bildirip, bas qosty.

«Qazir qoǵam eki tildi qosa alyp júr. Eger latynǵa ótsek, osy olqylyq joıylar edi. Óıtkeni, latyn álipbıine kóshý arqyly biz tildik qoldanysymyzdyń tarazy basyn teńestirer edik. Latyn álipbıi - álem qazaqtarynyń rýhanı birliginiń negizi. HHІ ǵasyr - aqparat ǵasyry desek, búgingi kompıýter zamanynda álemdik ǵalamtor júıesindegi aqparat kimniń qolynda bolsa, sol óz bıligin emin-erkin júrgize alady. Al, aqparattyń basty quraly - jazý. ıAǵnı, ǵalamtor júıesinde ústemdik jasaýshy, ol - latyn grafıkasy»,- deıdi Kentaý qalalyq «Jastar ortalyǵynyń» dırektory Qanat Bekmetov.

    Túbi bir túrki memleketterinde búginde osy álipbıdi qoldanady. Jańa alfavıt týystas eldermen baılanysty da nyǵaıtatyna senim mol. Ǵylym men bilim tiline aınalǵan latyn qarpi óziniń ústemdigin dáleldep keledi. Sondyqtan damyǵan eldiń qatarynda bolý úshin damyǵan tehnologııany meńgergen jón. Al álemdegi ortaq tehnıka tili búginde latyn álipbıinde jazylady. Osyndaı pikir aıtqan stýdentter   latyn álipbıi eń aldymen til tazalyǵyn saqtaıdy degen senimde. Basqosýda sóz alǵandar latyn álipbıine kóshý naýqanyna kenshiler qalasyndaǵy jastar bek daıyn ekenderin jetkizdi. Olar Elbasy kórsetken baǵyttan taımaı, bolashaqqa bet alý - ozat otyzdyqqa aparar jol ekenin jaqsy biledi. Sondyqtan da sarabdal saıasat, bilgir basshylyq adastyrmas jol, bolyp qala bermek.