Kentaý transformator zaýytynda dánekerleýshi robot jumys isteı bastady

KENTAÝ. QazAqparat - «Kentaý transformator zaýyty» AQ óndiris oshaǵynda bir ýaqytta 6 adamnyń jumysyn atqara alatyn, japondyqYaskawa Motoman dánekerleýshi roboty iske qosyldy. Bul týraly Indýstrııa jáne ınfraqurylymdyq damý mınıstrligine silteme jasap QazAqparat habarlaıdy.

Aıta ketý kerek, robot dánekerleý sapasyn arttyrýǵa jáne kásiporynnyń ónimdiligin arttyrýǵa arnalǵan. Bir dánekerleýshi mamannyń 8 saǵatta atqaratyn jumysyn robot 20 mınýt ishinde oryndap shyǵady.

Yaskawa Motoman roboty Japonııada oılap tabylǵan. Alaıda Shvetsııada qurastyrylyp, Ýkraına memleketinde arnaıy óndiriske laıyqty baǵdarlamasy engizilgen. Robotpen jumys isteý úshin Kentaýdaǵy zaýyttan 3 maman Ýkraına memleketine baryp, arnaıy is-tájirıbeden ótip kelgen. Bolashaqta zaýytty taǵy da osyndaı robottarmen tolyqtyrý josparda bar.

Aıta keterligi, bul dánekerleýshi - Qazaqstanda iske qosylǵan eń alǵashqy robot.

Kentaý transformator zaýyty – elektr energetıka, metallýrgııa, mashına jasaý, kólik, munaı-gaz keshenin jáne turǵyn úı-kommýnaldyq sektoryn qosa alǵanda, ekonomıkanyń barlyq salalaryna qajet keń qoldanysqa arnalǵan transformator jabdyqtarynyń jetekshi qazaqstandyq óndirýshisi.

Búginde kásiporynnyń negizgi mindetteriniń biri - eksporttyq áleýetti arttyrý. Óndiris oshaǵy «Nurly Jol» ınfraqurylymdy damytýdyń memlekettik baǵdarlamasy sheńberinde ónimderdiń eksporttyq áleýetin arttyrýǵa «Qazaqstannyń Damý Banki» AQ tarapynan qosymsha qarjylandyrý aldy. QDB 6% - ben 1,5 mlrd teńge mólsherinde nesıe usyndy.

Kentaý transformator zaýyty 1959 jyldan bastap jumys isteıdi jáne jabdyqty jańartý qajettiligi týyndady, «Ónimdilik 2020» memlekettik baǵdarlamasy sheńberinde QDB-Lızıng tarapynan usynylǵan qarjylandyrýǵa álemniń jetekshi óndirýshilerinen transformatorlar óndirý úshin metall óńdeý stanoktary satyp alyndy.

Qazir zaýytta 1153 adam eńbek etedi. Sonymen qatar, munda polıtehnıkalyq kolledj bar, onda stýdentter dýaldy oqytýdan ótip, sodan keıin bilimderin zaýytta qoldanatyndyǵyn atap ótken jón. Kolledj jyl saıyn 100-den astam maman shyǵarady, olar keıin zaýytta jáne «Alageum Electric» BK HK-da jumys isteıdi.