Kentaý transformator zaýyty janynda eki shaǵyn tseh ashyldy
Kentaý transformator zaýytyn búkil el biledi. Óndiristik qýaty joǵary kásiporyn kúni keshe «Altyn sapa» otandyq taýar óndirýshiler baıqaýynda júldegerler qatarynan tabyldy. Qýanysh eselenip otyr.
Zaýyt janynan taǵy eki birdeı shaǵyn tseh iske qosyldy. Qaladaǵy ındýstrıaldy aımaq ajaryn ashqan «Elektrodetal» jáne «Elektroprıbor» kásiporyndarynyń jumysymen jergilikti BAQ ókilderi tanysty. Transformatorǵa kerekti qosalqy bólshekterdi shyǵaratyn shaǵyn tsehta 50-ge jýyq jan jumys isteıdi.
Buǵan deıin zaýytqa qajetti detaldar shetel asyp keletin. Syrttan tasymaldaýǵa ketken shyǵyn da qaltaǵa salmaq túsiretin. Importqa degen táýeldilikti túbegeıli joıǵan bul joba otandyq taýar óndirýshige qol keldi. «Uly dala eli» brendi. Bul - transformator zaýytyna kúni keshe ǵana Arqa tósi Astanada ótken sapa baıqaýynan berilgen nomınatsııa. «Atameken» Ulttyq kásipkerler palatasy uıymdastyrǵan konkýrsta kásiporyn kóp ishinen sýyrylyp alǵa shyqty. Úzdik atandy.
El táýelsizdiginiń 25 jyldyq mereıtoıyna oraı zaýytta eńbek etken árbir jumysshyǵa tartý jasaldy. 25 myń teńge qarjy men bir qap unnan úlestirildi. Al, ujymdaǵy kóp balaly otbasylar men áleýmettik jaǵdaıy tómen 80 shańyraqqa áleýmettik qoldaý kórsetildi. 1200-den asa adamdy jumyspen qamtyp otyrǵan zaýyt taıaýda 80 megavatty transformator jasap shyǵardy. Basshylyq bul jemisti eńbekti el egemendiginiń 25 jyldyǵyna jasaǵan tartýymyz, - dep baǵalaıdy. Damýy - jedel, keleshegi - kemel kásiporynnyń jospary kóp.
