Kentaý saýda ortalyǵyndaǵy órtti sóndirýge 40-qa jýyq maman atsalysty

ASTANA. KAZINFORM — Túrkistan oblysynyń órt sóndirýshileri Kentaý qalasy Ál Farabı kóshesinde ornalasqan 3 qabatty ABK saýda ortalyǵynyń shatyryn sharpyǵan órtti sóndirdi.

Túrkistan oblysy Kentaý qalasy TJ bóliminiń málimetinshe, qutqarýshylar joǵary dárejemen jumys jasaǵan. 

Oqıǵa ornynda órt sóndirý jedel shtaby quryldy. Órti sóndirýge jeke quramnan 38 adam jáne 8 birlik tehnıka jumyldyryldy. Sonymen qatar órt sóndirý oqpandary úzdiksiz sý berý qamtamasyz etildi. Zardap shekkender joq. 

— Órt sóndirýshiler kelip jetkende 1000 sharshy metr saýda úıiniń shamamen 270 sharshy metr aýmaǵy janyp jatqany anyqtaldy. Saǵat 22:09 shamasynda órt tolyǵymen sóndirildi. Qazir órttiń shyǵý sebebi anyqtalyp jatyr, — dedi Túrkistan oblysy Kentaý qalasy TJ bóliminiń bastyǵy Serik Tólegenov.

Buǵan deıin Astanada úsh qabatty ǵımarat órtke oranǵanyn jazǵan edik.