Kentaý, Rıdder jáne Qyzylordadaǵy jylý kózderin jańǵyrtýǵa rezervten 16 mlrd teńge bólindi

ASTANA. KAZINFORM - Qazaqstan Úkimeti Memleket basshysy Qasym-Jomart Toqaevtyń tapsyrmasymen elimizdiń jylý elektr keshenin aýqymdy jańǵyrtý boıynsha jumystardy jalǵastyryp jatyr.

QR Premer-Mınıstri Oljas Bektenov Kentaý, Rıdder jáne Qyzylorda qalalaryndaǵy jylý kózderine rekonstrýktsııa jáne kúrdeli jóndeý júrgizý úshin Úkimet rezervinen qarajat bólý týraly qaýlylarǵa qol qoıdy.

Atap aıtqanda, Kentaýdaǵy JEO-5-tiń № 7, 8, 9, 10, 11 jáne 12 qazandyqtaryn rekonstrýktsııalaýǵa 9 mlrd teńgeden astam, Rıdder jylý elektr ortalyǵynyń tehnologııalyq jabdyqtary men ınfraqurylymyna kúrdeli jóndeý júrgizýge – 4,9 mlrd teńge, al Qyzylordadaǵy ońtústik qazandyqtyń úsh bý qazandyǵyn rekonstrýktsııalaýǵa – 2 mlrd teńgeden sál astam qarajat bólindi. Osylaısha, atalǵan jylý kózderin jańǵyrtýǵa jalpy somasy shamamen 16 mlrd teńge baǵyttaldy.

Qabyldanyp jatqan sharalar aldymyzdaǵy jylytý maýsymynda Kentaý, Rıdder jáne Qyzylorda turǵyndaryn jylýmen turaqty qamtamasyz etýge múmkindik bermek.

Jalpy elimiz boıynsha aldaǵy jylytý maýsymyna daıyndyq sheńberinde Astana, Almaty, Shymkent, Atyraý, Óskemen, Qaraǵandy, Aqtaý, Taraz, Petropavl, Pavlodar, Jezqazǵan, Aqtóbe, Ekibastuz, Stepnogor, Rýdnyı, Balqash jáne Aqsý qalalaryndaǵy 10 energoblok, 55 qazandyq pen 45 týrbınaǵa jóndeý jumystaryn júrgizý josparlanǵan.

Sonymen qatar ınvestıtsııalyq kelisimder aıasynda osy kúnderi Ekibastuzdaǵy GRES-1-diń №1 energoblogynda qalpyna keltirý jáne Atyraýdaǵy JEO men Topardaǵy GRES-te týrboagregattardy aýystyrý jumystary júrgizilip jatyr. Budan bólek, Ekibastuz GRES-inde №3 energoblok qurylysy, sondaı-aq Óskemendegi JEO men Qaraǵandydaǵy JEO-3-ti keńeıtý boıynsha jobalar josparlanǵan.

Joǵaryda atalǵan barlyq jobany júzege asyrý ortaq jıyntyǵy 1500 MVt-tan astam jańa qýatty iske qosýǵa múmkindik beredi.