Kentaý kóshelerinde 1953 jylǵy retro kólik júr
TÚRKІSTAN. KAZINFORM — Retro kólik uzaq jyldar garajda turyp qalǵan.

Kentaý qalasynda «Moskvıch-401» kóligi júr. 1953 jyly zaýyttan shyqqan mashına kópshiliktiń qyzyǵýshylyǵyn týǵyzǵaly biraz boldy.
Tipti, kóshede júrgen jerinen sıgnal basyp, toqtatyp alatyndar da bar. Al, bazarǵa barsa, jan-jaǵyna jınalyp, jón suraıtyndar kóp.

— Bári minip kórgisi keledi. Ásirese jastar jaǵy qatty qyzyǵady. Kósheden kórse, artymnan qalmaı qýyp jetedi. Sýretke túsip, ony-muny suraıdy.«Sat» deıtinder de bar. Qazirgi sheteldik kólikke aıyrbastaıyq degen usynys ta aıtyldy. Ony qaıtemin. Óz kóligim jaqsy. Satýǵa da qyzyqpaımyn. Ózim minip júrgim keledi, — deıdi kólik ıesi Amangeldi Tańatov.
Retro kólik garajda kóptegen jyldar boıy turyp qalǵan. Sodan, bıyl ıesi jóndetip, ıgiligine minýdi jón kóripti.
— Qajetti qosalqy bólshekteri bizde joq. Petropavl, Qostanaı jaqta bar eken. Biraq baryp alyp kelý tıimsiz boldy. Sodan «Jıgýlıdiń» qurylǵylaryn saldym. Dóńgelegi «Shevrolettiki». Motor, berilis qoraby — bári «Jıgýlıden» alynǵan, — deıdi kólik ıesi.

Búginde Amangeldi Tańatov retro kólikpen nemerelerin sabaqqa aparyp-ákeledi. Óz sharýalarymen Túrkistan, Shymkent qalalaryna jıi baryp turady.
Sondaı sátte vıdeo men sýretke túsirip alatyndar jıi kezdesedi.
— Birde nemerelerim «Ata, siz tık-tokta júrsiz goı» deıdi. Basynda túsinbedim. Keıin telefonnan vıdeolardy kórsetti. Jalpy, kólikke kópshilik óte qatty qyzyǵady. Qazir garajymda ekinshi retro kólik tur. Dál osy markadaǵa mashına. Ony da jóndetip jatyrmyn. Biraq satpaımyn. Ul-qyzdarymnyń qajetine jarap tursa, sol maǵan jetedi, — deıdi ol.

Aıta keteıik, budan buryn Túrkistanda moped tizgindegen 21 jasóspirimniń ata-anasy jaýapqa tartylǵanyn jazǵan bolatynbyz.
