Kentaý kolledjiniń stýdenti oqýshylarǵa kásibı baǵdar beretin erekshe stend jasady

ASTANA. KAZINFORM — Kentaý polıtehnıkalyq kolledjiniń 4-kýrs stýdenti Ulyqbek Bahtııarov jumysshy mamandaryn daıarlaýǵa arnalǵan oqý stendin jasap shyǵardy. Bul týraly Oqý-aǵartý mınıstrliginiń baspasóz qyzmeti habarlady. 

ASAR-1 — ınjenerlik mamandyqtardy biriktiretin bilim berý stendi. Onyń kómegimen 13 túrli ınjenerlik jáne tehnıkalyq baǵyttardyń negizderimen tanysýǵa bolady. Bul stend oqýshylarǵa bolashaq kásibin tańdaýǵa múmkindik beredi. Munda sondaı-aq elektronıka, avtomattandyrý, baǵdarlamalaý jáne mehatronıka baǵyttary boıynsha praktıkalyq tapsyrmalardy oryndaýǵa bolady.

Stendte 22 túrli datchık pen komponent qoıylǵan. Olardyń qatarynda DHT11 temperatýra men ylǵaldylyq datchıgi, dybys datchıgi, gazdy anyqtaý sensory, RFID modýli, Bluetooth jáne Wi-Fi modýlderi, ýltradybystyq datchık, servomotorlar, dıspleı, jaryqdıodtar, rele jáne basqa da elementter bar.

— Men oqýshylardyń mektep qabyrǵasynan bastap mamandyq tańdap, oǵan kásibı turǵyda daıyndalýyna kómekteskim keledi, — deıdi Ulyqbek.

Joba avtorynyń aıtýynsha, stendti jasaýǵa alty aı úzdiksiz ınjenerlik jumys pen izdenis qajet boldy. ASAR-1 elimizde jarııalanǵan Jumysshy mamandyqtar jyly aıasynda erekshe mańyzǵa ıe. Bul stend aýyl mektepterinen bastap, iri qalalardaǵy oqý oryndaryna deıin keńinen taralyp, tehnıkalyq mamandyqtardyń mártebesin kóterip, jastarǵa erte jastan kásibı baǵdar berýge úles qosa alady.

Aıta ketelik JOO-ǵa qujat qashan qabyldanatyny belgili boldy.