Kentaý qalasynyń jylytý maýsymyna daıyndyǵy pysyqtaldy
KENTAÝ. QazAqparat - Túrkistan oblysy Kentaý qalasyndaǵy qazandyqta qysqa daıyndyq jumystary qarqyndy júrgizilýde. Qazirgi tańda 60 paıyzy oryndalǵan, jumys 20 qazanǵa deıin tolyǵymen aıaqtalatyn bolady, dep habarlaıdy QazAqparat tilshisi.
Qalanyń qysqa daıyndyǵyn qamtamasyz etý úshin oblystyq bıýdjetten tıisti qarajat bólingen. Bul jumystarmen tanysý úshin oblystyq Tabıǵı monopolııalar departamentiniń ókili men «Qazaqstan Respýblıkasy Energetıka mınıstrligi Atomdyq jáne energetıkalyq qadaǵalaý men baqylaý komıtetiniń Túrkistan oblysy boıynsha aýmaqtyq departamenti» ókilderi kelip, aralap shyqty. Jumysshy top «Kentaý servıs» mekemesiniń atqaryp jatqan sharýalaryna oń baǵasyn berdi.
Bıyl kentaýlyqtar qystan qınalmaı shyǵatynyn aıtqan QR Energetıka mınıstrligi Atomdyq jáne energetıkalyq qadaǵalaý men baqylaý komıtetiniń Túrkistan oblysy boıynsha aýmaqtyq departament basshysy Bekjan Álimqulov daıyndyq máseleleri oblys basshysynyń tikeleı nazarynda ekenin jetkizdi.
Aıta keteıik, «Kentaý servıs» mekemesine 14534 abonent qosylǵan. Búgingi tańda mekemede 62 tonna suıyq otyn ázirlengen bolsa, 27 myńǵa jýyq tonna qatty otyn kelisimshart negizinde Ekibastuzdan Kentaý qalasyna jóneltilýde.
