Kentaý qalasynyń burynǵy ákimi para alǵany úshin on jylǵa bas bostandyǵynan aıyryldy

ALMATY. QazAqparat - Almatyda Kentaý qalasynyń burynǵy ákimi M-ǵa jáne para berý men alý faktisi boıynsha deldaldyqpen aınalysqan B. jáne T-ǵa qatysty qylmystyq is qaraldy, dep habarlaıdy QazAqparat tilshisi.

Almaty qalalyq sotynyń baspasóz qyzmeti habarlaǵandaı, sottalýshy M. óziniń qyzmettik jaǵdaıyn paıdalanýmen JShS dırektoryna «qamqorlyq» jasaǵany úshin odan memlekettik-jeke kásipkerlik shartynan 50 mln. teńge kólemindegi qarajatty berýge májbúrlegen. Osydan soń zańsyz syıaqyny alý úshin óziniń tanystary, aqshany alý barysynda ustalǵan B. jáne T-ny qylmystyq áreketke tartqan.

Sottalýshylar sotta ózderiniń kinálaryn moıyndaǵan joq.

Jaza taǵaıyndaý kezinde sot sottalýshy T. jáne M-da jas balalarynyń bolýy jáne sottalýshy M-nyń qylmysyn ashý men tergeýge belsendi yqpal etkeni úshin olarǵa jeńildetilgen jaǵdaıdy, sondaı-aq, sottalýshy M-nyń memlekettik qyzmetshiler antyn buzǵany úshin kinásin aýyrlatatyn jaǵdaıdy eskerdi.

«Sot úkimimen M. para alǵany úshin kináli dep tanylyp, oǵan ómir boıyna memlekettik qyzmette isteýine tyıym salynyp, qaýipsizdigi eń joǵary qylmystyq atqarý júıesi mekemelerinde 10 jyl merzimge bas bostandyǵynan aıyrý jazasy taǵaıyndaldy.

B. para bergeni úshin kináli dep tanyldy. Oǵan memlekettik qyzmette qyzmet atqarýǵa ómir boıyna tyıym salyndy jáne qaýipsizdigi eń tómen qylmystyq atqarý júıesi mekemesinde 1 jyl merzimge bas bostandyǵynan aıyrý jazasy taǵaıyndaldy.

T. para bergeni úshin kináli dep tanyldy. Memlekettik qyzmette qyzmet atqarýǵa ómir boıyna tyıym salyndy jáne qaýipsizdigi eń tómengi qylmystyq atqarý júıesi mekemelerinde 1 jyl, 6 aı merzimge bas bostandyǵynan aıyryldy.

«Úkim zańdy kúshine engen joq», - dep habarlady qalalyq sottan.

Buǵan deıin Kentaý qalasynyń ákimi 100 myń dollarǵa jýyq paramen ustalǵanyn habarlaǵan bolatynbyz.

https://kaz.inform.kz/news/100-myn-dollarga-zhuyk-para-aldy-dep-ayyptalgan-kentau-kalasynyn-akimi-ustaldy_a3904524

Sondaı-aq, Túrkistan oblysynyń ákimi Ómirzaq Shókeev Kentaý qalasyn basqarǵan Dáýren Mahajanovtyń qylmysy dáleldense, otstavkaǵa ketýge daıyn ekein aıtqan bolatyn.

https://kaz.inform.kz/news/kentau-akiminin-kylmysy-daleldense-otstavkaga-ketuge-dayynmyn-omirzak-shokeev_a3944784