Kentaý qalasynda «Altyn kúz» sharasy ótti
KENTAÝ. QazAqparat – Túrkistan oblysy, Kentaý qalasynda «Altyn kúz» sharasy ótti. Aıtýly is-shara aýyl sharýashylyǵy ónimderi usynylǵan jármeńkeden bastaý aldy, dep habarlaıdy QazAqparat tilshisi.
Qala ákimdiginiń uıymdastyrýymen ótken jármeńkede túrli kókónister arzandatylǵan baǵada satyldy. Mundaǵy taýar baǵasy bazardaǵydan 10-15 teńgege arzan saýdalandy. Jármeńkede qalaǵa qarasty aýyl jáne aýyldyq okrýginiń sharýa qojalyqtarynyń ónimderi satylymǵa shyǵaryldy. Munan keıin aıtýly shara kontserttik baǵdarlamaǵa ulasty. Jıynda qala ákimi Daýren Mahajanov sóz sóılep, aýyl sharýashylyǵy salasynyń úzdikterin marapattady. Ekonomıkaǵa serpin beretin jobalardyń arqasynda aýyl sharýashylyǵy qurylymdary aǵymdaǵy jyly 47 mıllıard teńgeniń ónimderin óndirgen. Bıyl 48 myń gektar jerge aýyl sharýashylyǵy daqyldary egilip, 1400 gektar jer tamshylatyp sýǵarý ádisimen ıgerilgen. «Elbasy Nursultan Nazarbaev kezekti Joldaýynda 2022 jylǵa deıin eńbek ónimdiligin 2 jarym esege ósirýdi, jańa ınnovatsııalyq tehnologııalar men jańa ádisterdi endire otyryp, jumys sapasyn arttyrýdy tapsyrǵan bolatyn. Sol ádisterdi qoldana otyryp, biz aýyl sharýashylyǵy ónimdiligin damytýymyz kerek»,-dedi qala ákimi. Aıta keteıik, Túrkistan oblysynyń ákimi Ómirzaq Shókeevtiń bastamasymen qala aýmaǵynda jańbyrlatyp sýǵarý tehnologııasyn engizý boıynsha aýqymdy jumystar atqarylýda. Bul ádis arqyly sharýalar aǵyn sýdy únemdep qana qoımaı, ónim kólemin de arttyrýǵa yqpal ete alady.
