Kentaý qalasyna qarasty eldimekende jańa mektep paıdalanýǵa berildi
KENTAÝ. QazAqparat – Túrkistan oblysynyń Kentaý qalasyna qarasty Aqyn-tuma eldi mekeninde jańa mektep paıdalanýǵa berildi. Shalǵaı aýyldyń oqýshylary endi ekinshi toqsandy jańa bilim uıasynda oqıtyn boldy, dep habarlaıdy QazAqparat tilshisi.
Osy ýaqytqa deıin atalǵan eldi mekende bir qabatty bastaýysh mektebi ǵana bolǵan. Al joǵary synyp oqýshylary aýyldyń ortalyǵyna qatynap bilim alyp kelgen. Endi mundaı qıyndyqtar artta qaldy. «Óńirlerdi damytý» baǵdarlamasy aıasynda respýblıkalyq bıýdjetten qarjy bólinip, aýylda 300 oryndyq jańa mektep boı kóterdi. Aqyn-tuma atyndaǵy bilim oshaǵyn salý jumystary ótken jyly bastalyp, aǵymdaǵy jyldyń tamyz aıynda aıaqtaldy. Jalpy aýmaǵy 6949 sharshy metrdi quraıdy. Endi aýyl balalary zaman talabyna saı bilim alatyn boldy.
Jańa mekteptiń ashylý saltanatyna qala ákiminiń orynbasary Samat Rasýl men qalalyq máslıhat hatshysy Talǵat Balabıev, qalalyq máslıhat depýtattary men aýyl turǵyndary qatysty. Jınalǵandar bilim uıasynyń ashylýyna oraı izgi tilekterin jetkizip, mekteptiń lentasyn kesti.
Aıta keteıik, zamanaýı úlgide salynǵan ǵımaratta kúndelikti sabaqtarǵa qajetti qural-jabdyqtarmen qatar, zerthanalyq, pán kabınetteri bar. Sportzal men ashanasy da qarastyrylǵan.
