Kentaý qalasyna gaz berildi
KENTAÝ. QazAqparat - Túrkistan oblysy Kentaý qalasyna alǵash ret gaz berildi. Qala turǵyndarynyń qýanyshyna oblys ákimi Ómirzaq Shókeev ortaqtasyp, jergilikti halyqpen kezdesý ótkizdi, dep habarlaıdy QazAqparat tilshisi.
Kentaý Túrkistanmen qatar damyp, áleýeti kóteriledi. Monoqalanyń básekege qabilettiligi joǵarylaıdy. Oǵan tolyq múmkindik bar. Osylaı degen Túrkistan oblysynyń ákimi Ómirzaq Shókeev Kentaýdaǵy Sh.Qaldaıaqov atyndaǵy mádenıet saraıynda turǵyndarmen kezdesti.
«Búgin kentaýlyqtar úshin kópten kútken másele sheshilip, qalaǵa gaz berilip otyr. Basshy retinde osy bastamany qysqa merzimde oryndaýǵa kúsh salyp, qarjy máselesin sheship, kompanııalarmen kelissóz júrgizip, sol mejege jetip otyrmyz. Jobany júzege asyrýda óte kúrdeli ári aýqymdy jumystar atqaryldy. Bul — Kentaý qalasy turǵyndarynyń ómir sapasyn arttyrady. Qalalaryńyzǵa gaz enip tur. Endi turǵyndar birlesip áreket etse, ár úıge kezeń-kezeńimen gaz kirgiziletin bolady», — dedi aımaq basshysy.
Oblys ákimi óńirdegi jumystardy baıandaı kele turǵyndardyń ótinishteri men suraqtaryn tyńdady. Kentaýdy damytý baǵytynda da jumys kúsheıetinin jetkizdi. Kezdesýde turǵyndar ınfraqurylym, qalany gazben qamtý, onomastıka, jumys oryndaryn kóbeıtý, jol, baspanamen qamtý, balalar oıyn alańshalaryn salý, Kentaý qalasynyń jastaryn «Serpin» baǵdarlamasyna engizýge yqpal etý jáne ózge de máselelerdi kóterdi. Ótkir suraqtar qoıyp, usynystaryn jetkizdi.
«El Prezıdenti Qasym-Jomart Toqaev bıylǵy Joldaýynda «Jańa Qazaqstandy» qurý baǵytyndaǵy negizgi mindetterdi aıqyndap berdi. Esep berý formaty ózgerip, basshylar turǵyndarmen erkin pikir almasyp, ózekti máselelerdi talqylap jatyr. Baıandama — az, turǵyndardan suraq kóp bolsa, degen ustanymdamyn. Oblysymyzda kóptegen sala boıynsha ósý, órleý bar ekenin aıta ketken jón. Jalpy oblys ortalyǵynyń Túrkistan qalasyna aýysýy Kentaýdyń damýyna úlken serpin berdi. 2021 jyly Kentaý qalasyn damytýǵa 1,3 mlrd.. teńge qarjy bólindi. Kópqabatty úıler modernızatsııalaýdan ótti. Shahtanyń sýyn tómendetý jumystary júrgizilýde. Bıyl qalany damytýǵa 1,6 mlrd teńge baǵyttalyp otyr. Kentaý qalasy aýmaǵyndaǵy áleýmettik-ınfraqurylymdyq máselelerdi júıeli túrde kezeńimen sheshetin bolamyz», – dedi Ómirzaq Shókeev.
Eseptik jıyn sońynda oblys ákimi bir top turǵyndy jeke ótinishteri boıynsha qabyldady. Olardyń ótinishteri men suraqtaryn tyńdap, zań aıasynda keńes berdi. Birqatar túıtkilderdi sheshý boıynsha jaýapty basqarma basshylary men Kentaý qalasynyń ákimi Rashıd Aıýpovqa mindetter júktedi. Árbir usynys pen ótinish boıynsha tıisti jumys júrgiziledi.
