Kentaý qalasyna 8,3 mlrd teńge ınvestıtsııa tartylady
ASTANA. QazAqparat - Ońtústik Qazaqstan oblysynyń Kentaý qalasyna ótken jyly 6,5 mlrd teńge kóleminde ınvestıtsııa tartylsa, bıyl ol mejeni 8,3 mlrd teńgege jetkizý kózdelip otyr. Onyń 6 mıllıardy bıýdjet qarajaty esebinen jáne 2,3 mıllıardy jeke qarjylar esebinen bolmaq, dep habarlaıdy QazAqparat.
Bul týraly OQO óńirlik kommýnıkatsııalar qyzmetinde ótken brıfıngte Kentaý qalasynyń ákimi Ábdibaqyt Maqulbaev málim etti.
Ótken jyly óńirde ónerkásip salasynda 28,1 mlrd jteńgeniń ónimi óndirilip, naqty kólem ındeksi 107,2 paıyzdy quraǵan.
«Indýstrıaldy aımaqta 2 mlrd teńgege 8 jobany iske asyrý josparlanǵan. Búginde 2 joba tolyq iske qosylyp, 798 mln teńgeniń ónimi óndirildi. Qosymsha 2 jobanyń qurylys jumystary tolyǵymen aıaqtalyp, jyl sońyna deıin iske qosylady. Qalǵan 1 jobanyń qujattary saraptamadan ótip, aǵymdaǵy jyldyń І toqsanynda qurylys jumystary bastalady. Nátıjesinde 50-ge jýyq jańa jumys oryndary qurylady», - dedi Ábdibaqyt Tillábaıuly.
Qalǵan 3 joba boıynsha óńirlik úılestirý keńesine qujattardy tapsyrý, kelisý jáne rásimdeý jumystary júrgizilýde. Sondaı-aq, 3 kompanııa polımetall jáne barıt rýdalaryn qaıta óńdeý, óńdirý jumystaryn iske asyratyn bolady.
Sonymen qatar, «QR ındýstrıaldyq-ınnovatsııalyq damytýdyń 2015-2019 jyldarǵa arnalǵan memlekettik baǵdarlamasy» aıasynda búginde aımaqta jalpy quny 4,4 mlrd teńgeni quraıtyn 5 joba tolyq qýattylyqqa shyǵyp, 5,4 mlrd teńgeniń ónimi óndirilgen.
Kentaý qalasynda qazirgi tańda 2953 shaǵyn jáne orta kásipkerlik sýbektileri jumys istep tur. Bul ótken jylmen salystyrǵanda 6,8 paıyzǵa óskendigin kórsetedi.
«Atalǵan salada óndirilgen ónim kólemi 18,9 mlrd teńgege jetip, 7,6 paıyzǵa kóbeıgen. Aldaǵy ýaqytta shaǵyn jáne orta bıznes salasynda 136 jobaǵa 422 mln teńge kóleminde nesıe berý josparlanyp otyr. Jalpy osy baǵytta 700-ge jýyq turaqty jumys orny ashylatyn bolady», - dedi Ábdibaqyt Maqulbaev. 
Aıta keterligi, óńirde ótken jyly memlekettik baǵdarlamalardy júzege asyrý maqsatynda qarjy ınstıtýttary arqyly 259 mln teńgege 95 joba qarjylandyrylyp, nátıjesinde 150-ge jýyq azamat jumyspen qamtyldy. 
