Kentaý qalasy Túrkistanmen qatar damıdy - Ómirzaq Shókeev
TÚRKІSTAN. QazAqparat - Túrkistan oblysy ákimdiginde ótken májilis otyrysynda Kentaý qalasynyń ákimi Dáýren Mahajanov shahardyń damý josparlarymen bólisti, dep habarlaıdy QazAqparat tilshisi.
Dáýren Mahajanovtyń aıtýynsha, Qotyrbulaq eldimekeninde salynyp jatqan kún sáýlesinen qýat alatyn elektrostantsııa qurylysy jyl sońyna deıin aıaqtalady. «Hevel Kazahstan» JSSh jobasynyń quny 15,9 mlrd teńgeni quraıdy. Sondaı-aq, Kentaýda polıetılendi trýba, radıator shyǵaratyn tsehtar men «Temir-beton buıymdaryn óndirý zaýyty» iske qosylady.
«Bıyl «Aýyl – El besigi» baǵdarlamasy aıasynda Kentaý qalasyna qarasty Shaǵa jáne Orańǵaı aýyldarynda 1 mektep kúrdeli jóndeýden ótti. 36 jol jóndelip, jaıaý júrginshi joldary salyndy, kósheler jaryqtandyrylýda. «Jumyspen qamtýdyń jol kartasy» baǵdarlamasymen 35 mektep aǵymdaǵy, 1 mektep kúrdeli jóndeýden ótti. Kósheler de retke keltirilip, saıabaqtar abattandyryldy. 1 kópir jáne jaıaý júrginshi joldar jóndelýde. Atalǵan baǵdarlama aıasynda 300-den astam jumys ornyn ashý josparlanǵan», – dedi Kentaý qalasynyń ákimi.
Májiliske tóraǵalyq etken Ómirzaq Shókeev kezinde óndirisi órkendegen óńir bolǵan 65 jyldyq tarıhy bar qalany damytýdy tapsyrdy.
«Kentaý qalasy Túrkistanmen qatar damıdy. Qalaǵa qarasty aýyldyq okrýg halqynyń áleýmettik, qurylys, ınfraqurylymdyq muń-muqtajdary men ózekti máselelerin der kezinde sheshýdi tapsyramyn. Aýylsharýashylyǵy, kásipkerlik jáne óndiristi damytyp, ınnovatsııalyq jobalarǵa basymdyq berýdi mindetteımin», – dedi Ómirzaq Shókeev.
