Kentaý qalasynda jańbyrdan keıin kóshelerdi sý basty
TÚRKІSTAN. KAZINFORM – Tolassyz jaýǵan jaýyn-shashyn saldarynan Kentaý qalasynyń birqatar kóshelerinde sý jınalyp, qozǵalys qıyndady. Jaýapty kommýnaldyq mekemelerdiń jumysshylary men arnaıy tehnıkalary tolyq kólemde jumyldyryldy.
Ásirese, Ýálıhanov, Logınov jáne Seıfýllın kósheleriniń keı bólikterinde kólkigen sý júrginshiler men júrgizýshilerge qolaısyzdyq týǵyzdy. Atalǵan aýmaqtarda «Aşysaı Sý» mekemesi tarapynan 3 ekskavator men 3 brıgada tartylyp, jóndeý jáne tazalaý jumystary júrgizilip jatyr.
Baıtursynov jáne Quralbaev kóshelerinde de qozǵalys ýaqytsha qıyndady. Bul aýmaqtarǵa qosymsha 4 tehnıka jetkizildi jáne sý sorý maqsatynda 4 motopompa iske qosylyp, 2 brıgada kómekke keldi.
– Sonymen qatar «Jasyl qala» mekemesi tarapynan qajetti tehnıkalar jumyldyrylyp, 120 jumysshy qajetti qural-saımandarmen qamtamasyz etildi. Sý alý qaýpi bar aýmaqtarda lotoktar men aryqtardaǵy jaýyn sýynyń erkin aǵýyn qamtamasyz etý, tazalaý jáne baqylaý jumystary turaqty túrde júrgizilip jatyr, – delingen qala ákimdiginiń habarlamasynda.
Budan bólek, kishi ıAsaýı kóshesi (Qazyna saýda ortalyǵy mańy), Tóle bı men Baıtursynov kósheleriniń qıylysy, Búrgem shaǵynaýdany, sondaı-aq Kentaý-Qarnaq jáne Kentaý-Túrkistan avtojoldary boıyndaǵy iri sý ótkelderinde sý deńgeıinen kóterilip, arnasynan tasyǵan.
Atalǵan aýmaqtarda jedel sharalar qabyldanyp, nátıjesinde sý arnalary retke keltirilip, týyndaǵan zardaptar tolyqtaı joıyldy.
Budan buryn Túrkistan oblysynda sý arnasynan aýdandyq mańyzy bar jolǵa qaýip tónip turǵanyn jazǵan edik.